തിരുവനന്തപുരം: സ്കൂള് യൂണിഫോമിലെത്തിയ പെണ്കുട്ടി ജൂവലറിയില് നിന്ന് പണം കവര്ന്നു. നെയ്യാറ്റിന്കരയിലെ മൂകാംബിക സില്വര് പാലസ് എന്ന കടയിലാണ് സംഭവം.
പെണ്കുട്ടി കടയില് എത്തിയപ്പോള് പ്രായമായ ഒരു ജീവനക്കാരന് മാത്രമാണ് അവിടെ ഉണ്ടായിരുന്നത്. ഇയാള് ഉറക്കത്തിലായിരുന്നു. മറ്റൊരു ജീവനക്കാരന് ബാങ്കില് പോയിരുന്നു. ഇത് മനസിലാക്കിയ പെണ്കുട്ടി ക്യാഷ് കൗണ്ടറില്നിന്നും ബാഗ് എടുത്ത് പുറത്തിറങ്ങി. എന്നാല് ബാഗില് താക്കോല് മാത്രമേ ഉള്ളൂവെന്ന് മനസിലാക്കിയതോടെ വീണ്ടും കടയില് കയറി ക്യാഷ് കൗണ്ടറില് വെച്ചിരുന്ന ഒരു കെട്ട് നോട്ട് മോഷ്ടിക്കുകയായിരുന്നു. 25,000 രൂപ നഷ്ടപ്പെട്ടുവെന്ന് കടയിലെ ജീവനക്കാരന് പറഞ്ഞു. പെണ്കുട്ടി കടയില് നിന്നും പണം എടുത്ത് മടങ്ങുന്ന ദൃശ്യങ്ങള് സിസിടിവി ക്യാമറയില് തെളിഞ്ഞിട്ടുണ്ട്.
ബാങ്കില് പോയ ജീവനക്കാരന് തിരികെ എത്തിയപ്പോഴാണ് പണം നഷ്ടമായ വിവരം അറിയുന്നത് തുടര്ന്ന് ഇയാള് സിസിടിവി പരിശോധിച്ചപ്പോള് പെണ്കുട്ടിയാണ് മോഷണം നടത്തിയതെന്ന് വ്യക്തമായി. കടയുടമ നല്കിയ പരാതിയില് പോലീസ് അന്വേഷണം ആരംഭിച്ചു.
