കോഴിക്കോട്: പ്രധാനമന്ത്രി ഭാരതീയ ജന് ഔഷധി പരിയോജന (പിഎംബിജെപി) പദ്ധതി പ്രകാരമുള്ള ജന്ഔഷധി സ്റ്റോറുകളുടെ പേര് ഉപയോഗിക്കുന്ന സ്വകാര്യ ജനറിക് മെഡിക്കല് ഷോപ്പുകള് വീണ്ടും വ്യാപകമാവുന്നു. ജന് ഔഷധി സ്റ്റോര് എന്നതിന്റെ ചുരുക്കരൂപമെന്ന നിലയില് ജാസ് എന്ന പേരില് നേരത്തെ ചിലയിടങ്ങളില് ഷോപ്പുകള് തുടങ്ങിയിരുന്നതിനെതിരെ പിഎംബിജെപി അധികൃതര് നടപടി സ്വീകരിച്ചിരുന്നു.
പ്രമുഖ കമ്പനികളുടെ ബ്രാന്ഡഡ് മരുന്നുകള്ക്ക് പകരം സ്വകാര്യ കമ്പനികള് ഉത്പാദിപ്പിക്കുന്ന ജനറിക് മരുന്നുകള് വില്ക്കുന്ന കടകള് കേരളത്തിലെ പ്രധാന നഗരങ്ങളിലെല്ലാമുണ്ട്. ഇവിടങ്ങളില് ബ്രാന്ഡഡ് മരുന്നുകളേക്കാള് 40 ശതമാനം മുതല് 70 ശതമാനം വരെ വിലക്കുറവുണ്ടെങ്കിലും, ജന് ഔഷധി കേന്ദ്രങ്ങളില് വില്ക്കുന്ന മരുന്നുകള്, സര്ക്കാര് സംവിധാനത്തിലൂടെ വിതരണം ചെയ്യുന്നതിനാലും നാഷണല് അക്രിഡേറ്റേഷന് ബോര്ഡ് ഫോര് ടെസ്റ്റിങ് ആന്ഡ് കാലിബ്രേഷന് ലബോറട്ടറീസിന്റെ പരിശോധന കഴിഞ്ഞെത്തുന്നതിനാലും ജനങ്ങള്ക്കും ഡോക്ടര്മാര്ക്കും ഇടയില് ജന് ഔഷധി മരുന്നുകള്ക്ക് വിശ്വാസ്യത കൂടുതലാണ്.
ഈ സല്പേര് പ്രയോജനപ്പെടുത്തുന്നതിനാണ് ജന് ഔഷധി സ്റ്റോര് എന്ന പേര് വ്യാജന്മാര് ഉപയോഗിക്കുന്നത്. ജന് ഔഷധി കേന്ദ്രം ആരംഭിക്കുന്നതിനുള്ള വ്യവസ്ഥകളൊന്നും പാലിക്കാതെ തന്നെ ഡ്രഗ് ലൈസന്സും ജിഎസ്ടിയും ഉണ്ടെങ്കില് ഇത്തരം ജനറിക് സ്റ്റോറുകള് തുടങ്ങാനാവുമെന്നതും ജന് ഔഷധി മരുന്നുകള്ക്ക് കിട്ടുന്നതിനേക്കാള് കമ്മീഷന് ലഭിക്കുമെന്നതുമൊക്കെ ഇത്തരം സ്റ്റോറുകള് തുടങ്ങാന് പ്രേരണയാകുന്നു.
മധ്യപ്രദേശ് ആസ്ഥാനമായി പ്രവര്ത്തിക്കുന്ന ജന് ഔഷധി സംഘ് എന്ന സ്ഥാപനം ജാസ് മെഡിക്കല്സ് എന്ന പേരില് കേരളത്തില് പലയിടത്തും മെഡിക്കല് സ്റ്റോറുകള് തുറന്നിട്ടുണ്ട്. ജന്ഔഷധി മരുന്നുകളുടെ പാക്കിങിനോട് സാമ്യമുള്ളതാണ് ഇവരുടെയും പാക്കിങ്. നേരത്തെ ഇത്തരം സ്റ്റോറുകള് കണ്ടെത്തിയതിനെ തുടര്ന്ന് കേരളത്തിലും മറ്റ് സംസ്ഥാനങ്ങളിലും കേസുകള് നിലവിലുണ്ട്. ജന് ഔഷധിയുമായി സാമ്യമുള്ള പേരുകളില് മെഡിക്കല് സ്റ്റോര് തുടങ്ങാനുള്ള ഡ്രഗ് ലൈസന്സ് അനുവദിക്കരുതെന്ന് ഡ്രഗ് കണ്ട്രോള് ഓഫ് ഇന്ത്യ സംസ്ഥാന ഡ്രഗ് കണ്ട്രോളര്മാര്ക്ക് നല്കിയ നിര്ദേശവും നിലനില്ക്കുന്നുണ്ട്.
