കൊച്ചി : സിപിഎം സംസ്ഥാന സമ്മേളനത്തിന് കൊച്ചി മറൈന് ഡ്രൈവില് തുടക്കമായി. മുതിര്ന്ന നേതാവ് ആനത്തലവട്ടം ആനന്ദനാണ് പാര്ട്ടി പതാക ഉയര്ത്തി സമ്മേളനത്തിന് തുടക്കം ഇട്ടത്. പാര്ട്ടി ജനറല് സെക്രട്ടറി സീതാറാം യെച്ചൂരിയാണ് പ്രതിനിധി സമ്മേളനം ഉദ്ഘാടനം ചെയ്യുന്നത്.
സംസ്ഥാന സെക്രട്ടറി കോടിയേരി ബാലകൃഷ്ണന് പ്രവര്ത്തന റിപ്പോര്ട്ട് അവതരിപ്പിക്കും. സമ്മേളനത്തിന്റെ ഏറ്റവും പ്രധാന അജന്ഡയായ നവകേരള സൃഷ്ടിക്കുള്ള നയരേഖ നാലുമണിക്ക് മുഖ്യമന്ത്രി പിണറായി വിജയന് അവതരിപ്പിക്കും. തുടര്ന്ന് ജില്ലതിരിച്ചുള്ള ഗ്രൂപ്പുചര്ച്ചകള്ക്കായി പിരിയും.
രണ്ടാംതീയതി പൂര്ണമായും പ്രവര്ത്തനറിപ്പോര്ട്ടിലുള്ള ചര്ച്ചയാണ്. മൂന്നാംതീയതി നവകേരള നയരേഖയെക്കുറിച്ചുള്ള ചര്ച്ച നടക്കും. രണ്ടു ചര്ച്ചകള്ക്കുമുള്ള മറുപടി പാര്ട്ടി സെക്രട്ടറിയും മുഖ്യമന്ത്രിയും നല്കും. നാലാംതീയതി രാവിലെ സംസ്ഥാനകമ്മിറ്റി തിരഞ്ഞെടുപ്പ്. പുതിയ കമ്മിറ്റി ചേര്ന്ന് സെക്രട്ടറിയെ അപ്പോള്ത്തന്നെ പ്രഖ്യാപിക്കും.
കൊടി- കൊടിമര- പതാക ജാഥകളുടെ സമ്മേളന നഗരിയിലേക്കുള്ള വരവും പതാക ഉയര്ത്തലും കോവിഡ് സാഹചര്യത്തില് വേണ്ടെന്നുവെച്ചു. ചുവപ്പുസേന പരേഡും പ്രകടനവും ഒഴിവാക്കിയിട്ടുണ്ട്. മറൈന്ഡ്രൈവില് വൈകീട്ട് അഞ്ചിനുനടക്കുന്ന സമാപനപൊതുസമ്മേളനം മുഖ്യമന്ത്രി പിണറായി വിജയന് ഉദ്ഘാടനം ചെയ്യും.
സിപിഎം രൂപംകൊണ്ട ശേഷം വിഎസ് ഇല്ലാതെ ആദ്യ സിപിഎം സംസ്ഥാന സമ്മേളനം കൂടിയാണ് ഇത്. 92 ന് ശേഷം നടന്ന സമ്മേളനങ്ങളിലെല്ലാം വിഎസ് ഉയര്ത്തിയ വിഷയങ്ങളെ കുറിച്ചായിരുന്നു ചര്ച്ചകളെല്ലാം. 80 മുതല് 92 വരെ അദ്ദേഹം പാര്ട്ടി സെക്രട്ടറിയായിരുന്നു. ശേഷം 92 ല് കോഴിക്കോട് സെക്രട്ടറി സ്ഥാനത്ത് മത്സരിച്ചു തോറ്റതോടെയാണ് സമ്മേളനങ്ങളിലെ ചര്ച്ചകള് വിഎസ് കേന്ദ്രീകൃതമായത്.
തന്റെ അച്ഛന് പങ്കെടുക്കാത്ത ആദ്യ സമ്മേളനമാണ് ഇത്തവണത്തേതെന്ന് വി.എ. അരുണ്കുമാര് ഫേസ്ബുക്കില് അറിയിച്ചു. സ്ട്രോക്കുണ്ടാക്കിയ ശാരീരിക ബുദ്ധിമുട്ടുകള്ക്കിടയില് കോവിഡിന്റെ കഠിനമായ വിഷമതകള് കൂടിയായപ്പോള് വിഎസിന് യാത്ര സാധ്യമല്ലാതായെന്ന് അരുണ് കുമാര് അറിയിച്ചു.
