കോഴിക്കോട്: തലശ്ശേരി മണ്ഡലം പ്രസിഡന്റും നഗരസഭ കൗണ്സിലറുമായ ലിജേഷിനെ കൊലപാതക കേസില് അറസ്റ്റ് ചെയ്തത് സിപിഎമ്മിന്റെ രാഷ്ട്രീയ പകപോക്കലാണെന്ന് ബിജെപി സംസ്ഥാന അദ്ധ്യക്ഷന് കെ.സുരേന്ദ്രന്. കേരളത്തിലെ പല രാഷ്ട്രീയ കൊലപാതകങ്ങള്ക്കും കാരണം സിപിഎം നേതാക്കള് നടത്തിയ പ്രകോപന പ്രസംഗങ്ങളാണ്. ലിജേഷിന്റെ ജനപ്രീതിയില് ഇഷ്ടപ്പടാത്ത സിപിഎം നേതാക്കള് അദ്ദേഹത്തെ കള്ളക്കേസില് പ്രതിയാക്കി ജയിലിലടയ്ക്കുകയാണെന്നും സുരേന്ദ്രന് പറഞ്ഞു.
പ്രസംഗത്തിന്റെ പേരില് കേസ് എടുക്കുകയാണെങ്കില് കോടിയേരി ബാലകൃഷ്ണന് ഉള്പ്പെടെയുള്ള സിപിഎം നേതാക്കെള്ക്കെതിരെയാണ് ആദ്യം കേസെടുക്കേണ്ടത്. ഹരിദാസിനെ കൊലപ്പെടുത്തിയതിനു പിന്നില് കൃത്യമായ ആസൂത്രണമുണ്ടെന്ന് എന്തടിസ്ഥാനത്തിലാണ് പൊലീസ് പറയുന്നതെന്ന് സുരേന്ദ്രന് ചോദിച്ചു.
കൊല നടന്ന് പ്രതികളെ പിടികൂടുന്നതിന് മുമ്പ് ഗൂഡാലോചന തെളിയിക്കുന്നത് വിചിത്രമായ കാര്യമാണ്. പൊലീസിനെ ഉപയോഗിച്ച് ബിജെപിയുടെ സംഘടനാ പ്രവര്ത്തനം തടയാമെന്നത് പിണറായി സര്ക്കാരിന്റെ വ്യാമോഹം മാത്രമാണ്. ഭരണകൂട ഫാസിസത്തിനെതിരെ ബിജെപി ശക്തമായ പ്രതിഷേധം സംഘടിപ്പിക്കും. ബഹുജനങ്ങളെ അണിനിരത്തി സിപിഎമ്മിന്റെ ജനാധിപത്യവിരുദ്ധ സമീപനത്തിനെതിരെ സമരം തുടങ്ങുമെന്നും സുരേന്ദ്രന് പറഞ്ഞു.
