കണ്ണൂര് : കണ്ണൂരില് ഹോട്ടലുടമയെ കുത്തിക്കൊന്നു. കണ്ണൂര് സിറ്റി സ്വദേശിയായ സുഫി മക്കാനി ഹോട്ടല് ഉടമയായ ജംഷീര് ആണ് കൊല്ലപ്പെട്ടത്. സംഭവത്തില് രണ്ട് പേരെ പോലീസ് കസ്റ്റഡിയില് എടുത്തിട്ടുണ്ട്. ഇവരെ ചോദ്യം ചെയ്തു വരികയാണ്.
തിങ്കളാഴ്ച രാത്രി 12.40 ഓടെയാണ് സംഭവം. ജംഷീര് ഹോട്ടല് അടച്ച് വീട്ടിലേക്ക് പോകുന്നതിനിടെ താഴെത്തെരു ഭാഗത്തുവെച്ച് രണ്ട് പേര് മറ്റൊരു കാറിലെത്തി തടഞ്ഞു നിര്ത്തി. ഇത് ചോദ്യം ചെയ്തതോടെ തര്ക്കം ഉണ്ടാവുകയും ജംഷീറിന് കുത്തേല്ക്കുകയുമായിരുന്നു.
ഉടന് തന്നെ ജംഷീറിനെ ജില്ലാ ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല. ആഴത്തിലേറ്റ മുറിലാണ് മരണകാരണമെന്നാണ് ഡോക്ടര്മാര് പറയുന്നത്.
അതേസമയം കൊലപാതകം ആസൂത്രിതമല്ലെന്നാണ് പോലീസിന്റെ പ്രാഥമിക നിഗമനം. കസ്റ്റഡിയിലുള്ള പ്രതികളെ ചോദ്യം ചെയ്യുകയാണ്. ഇത് പൂര്ത്തിയായാല് മാത്രമേ കൂടുതല് വിവരങ്ങള് ലഭിക്കുകയുള്ളൂവെന്നും പോലീസ് വ്യക്തമാക്കി.
