ബെംഗളൂരു : കോവിഡ് വ്യാപനത്തിന്റെ പശ്ചാത്തലത്തില് കര്ണ്ണാടക ഏര്പ്പെടുത്തിയ നിയന്ത്രണങ്ങളില് ഇളവ് വരുത്തി. തിങ്കളാഴ്ച മുതല് സ്കൂളുകള് തുറക്കാനും രാത്രികാല നിയന്ത്രണങ്ങള് നീക്കാനും തീരുമാനിച്ചിട്ടുണ്ട്. സംസ്ഥാന സര്ക്കാര് പുതുക്കിയ മാര്ഗ്ഗ നിര്ദ്ദേശങ്ങള് പുറത്തിറക്കി കഴിഞ്ഞു.
സംസ്ഥാനത്തെ കോവിഡ് രോഗികളുടെ എണ്ണം കുറയുകയും കോവിഡ് മുക്തിനിരക്ക് വര്ധിച്ചതിനെ തുടര്ന്നാണ് നിയന്ത്രണങ്ങളില് ഇളവ് വരുത്തിയത്. മെട്രോ ട്രെയിന്, ബസ് അടക്കമുള്ള പൊതുഗതാഗതങ്ങളില് അതിന്റെ സീറ്റുകള്ക്ക് ആളുകളെ ഉള്ക്കൊള്ളിക്കാം. തിയേറ്ററുകള്, ഓഡിറ്റോറിയങ്ങള്, മള്ട്ടിപ്ലെക്സുകള് എന്നിവയില് 50 ശതമാനം ആളുകളെ പ്രവേശിക്കാം.ഹോട്ടലുകള്, റസ്റ്റോറന്റുകള്, ക്ലബ്ലുകള്, പബ്ബുകള്, ബാറുകള് എന്നിവിടങ്ങള്ക്കും പ്രവര്ത്തിക്കാമെന്നും പുതിയ മാര്ഗ നിര്ദ്ദേശത്തില് പറയുന്നുണ്ട്.
വിവാഹ പാര്ട്ടികളില് 300 പേര്ക്ക് പങ്കെടുക്കാം. ആരാധനാലയങ്ങള്, ജിം, സ്വിമ്മിങ് പൂളുകള് എന്നിവിടങ്ങളിലും 50 ശതമാനം ആളുകളെ പ്രവേശിപ്പിക്കാമെന്നും സര്ക്കാര് അറിയിച്ചിട്ടുണ്ട്. ഞായറാഴ്ചകളിലെ ലോക്ഡൗണ് കര്ണ്ണാടക നേരത്തെ മാറ്റിയത്.
കര്ണാടകത്തില് വെള്ളിയാഴ്ച 31,198 പുതിയ കോവിഡ് കേസുകളാണ് റിപ്പോര്ട്ട് ചെയ്യപ്പെട്ടത്. തൊട്ടുമുമ്പത്തെ ദിവസത്തേക്കാള് 7000 കേസുകളുടെ കുറവുണ്ട്. കര്ണാടകത്തില് റിപ്പോര്ട്ട് ചെയ്യപ്പെടുന്ന കോവിഡ് കേസുകളില് പകുതിയും ബെംഗളൂരുവിലാണ്.
