കോട്ടയം: സിപിഎം കൗണ്‍സിലറിന്റെ സഹോദരന്റെ കടയില്‍ നിന്നും വന്‍തോതില്‍ നിരോധിത പുകയില ഉല്പ്പന്നങ്ങള്‍ പിടികൂടി. വാരിശ്ശേരി കവലയ്‌ക്കു സമീപമുള്ള കടയില്‍ നിന്നാണ് വന്‍തോതില്‍ നിരോധിത പുകയില ഉല്പന്നങ്ങള്‍ പിടികൂടിയത്.
നിരോധിത പുകയില ഉല്പ്പന്നങ്ങളുമായി കട ഉടമ മള്ളൂശ്ശേരി മര്യാത്തുരുത്ത് മുറിക്കല്‍ വീട്ടില്‍ സുരേഷ് (38) നെ കോട്ടയം വെസ്റ്റ് പോലീസ് കസ്റ്റഡിയിലെടുത്തു. വര്‍ഷങ്ങളായി ഇയാള്‍ ഇവിടെ നിരോധിത പുകയില ഉല്പന്നങ്ങള്‍ വിറ്റുവരുകയാണ്. നിരവധി തവണ ഈ കുറ്റത്തിന് ഇയാളെ അറസ്റ്റു ചെയ്യുകയും ജാമ്യത്തില്‍ വിടുകയും ചെയ്തിട്ടുണ്ട്.
പോലീസ് റെയ്ഡിനു എത്തുന്നത് മുന്‍കൂട്ടി അറിഞ്ഞ് ഇയാള്‍ പലപ്പോഴും കട അടച്ച് രക്ഷപ്പെടുകയാണ് പതിവ്. കട റെയ്ഡ് ചെയ്യുവാന്‍ വരുന്ന വിവരം പോലീസില്‍ നിന്നു തന്നെ രഹസ്യമായി അറിഞ്ഞ് ഇയാള്‍ രക്ഷപ്പെടുന്നതായി നാട്ടുകാര്‍ ആരോപിക്കുന്നു.
കഴിഞ്ഞ ദിവസം നടന്ന റെയ്ഡിലും ഇയാള്‍ക്ക് ഇങ്ങനെ രഹസ്യവിവരം ലഭിച്ചെന്നും എന്നാല്‍ കടയടച്ച് മുങ്ങുന്നതിനു മുമ്പ് പോലീസ് എത്തിയതിനാലാണ് പിടിയിലായതെന്നും നാട്ടുകാര്‍ പറയുന്നു. കസ്റ്റഡിയിലെടുത്ത ഇയാളെ പിന്നീട് ജാമ്യത്തില്‍ വിട്ടു.
പ്രതികരിക്കാൻ ഇവിടെ എഴുതുക: