മലപ്പുറം : മലപ്പുറത്ത് വീണ്ടും ശൈശവ വിവാഹം നടന്നതായി ആരോപണം. പതിനാറുകാരിയെ വിവാഹം ചെയ്തു നല്കിയതായാണ് ആരോപണം. പെണ്കുട്ടിയുടെ ബന്ധുവായ വണ്ടൂര് സ്വദേശിക്ക് ഒരു വര്ഷം മുമ്പാണ് വിവാഹം ചെയ്തു നല്കിയത്. ഗര്ഭിണിയായ പെണ്കുട്ടിയെ ചികിത്സക്കെത്തിച്ചപ്പോഴാണ് പ്രായപൂര്ത്തിയായിട്ടില്ലെന്ന് വ്യക്തമായത്.
ഇതോടെ ആശുപത്രി അധികൃതര് പോലീസിനേയും ചൈല്ഡ്ലൈന് പ്രവര്ത്തകരേയും വിവരമറിയിച്ചു. നിലവില് പെണ്കുട്ടി ആറ് മാസം ഗര്ഭിണിയാണ്. തുടര്ന്ന് അധികൃതര് സ്ഥലത്തെത്തി സംരക്ഷണ കേന്ദ്രത്തിലേക്ക് മാറ്റി.
ഒരു വര്ഷം മുമ്പാണ് പ്രദേശവാസികളെ ആരേയും അറിയിക്കാതെയാണ് പെണ്കുട്ടിയുടെ വിവാഹം നടത്തിയത്. ദിവസങ്ങള്ക്ക് മുമ്പ് ആശുപത്രി അധികൃതരുടെ ഇടപെടലിലാണ് സംഭവം പുറത്തറിയുന്നത്. വിഷയത്തില് പോലീസിന് റിപ്പോര്ട്ട് നല്കിയിട്ടുണ്ടെന്ന് ചൈല്ഡ് വെല്ഫയര് കമ്മിറ്റി ജില്ല ചെയര്പേഴ്സണ് അറിയിച്ചു.
പെണ്കുട്ടിയെ വിവാഹം ചെയ്ത വണ്ടൂര് സ്വദേശിക്കെതിരേ ശൈശവവിവാഹ നിരോധന നിയമപ്രകാരവും പോക്സോ നിയമപ്രകാരവും പോലീസ് കേസെടുക്കും. സംഭവത്തില് അന്വേഷണം തുടങ്ങിയതായി പോലീസ് അറിയിച്ചു.
