തിരുവനന്തപുരം: കോവിഡ് വ്യാപനത്തിന്റെ പശ്ചാത്തലത്തില് 50 പേരില് കൂടുതലുള്ള പാര്ട്ടി സമ്മേളനങ്ങള്ക്ക് വിലക്കേര്പ്പെടുത്തിയ ഹൈക്കോടതി നടപടിക്കെതിരെ സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്. സിപിഐ എമ്മിന്റെ അഭിപ്രായം കേള്ക്കാതെയാണ് സമ്മേളനം സംബന്ധിച്ച ഹൈക്കോടതി വിധി. എങ്കിലും കോടതിയെ മാനിച്ചാണ് കാസര്കോട് സമ്മേളനം അവസാനിപ്പിച്ചത്.
കോടതി ഇടപെടല് കാസര്കോട് ജില്ലാ സമ്മേളനത്തിന് മാത്രമാണ് ബാധകം. തൃശൂരിന് ബാധകമല്ലന്നും കോടിയേരി പറഞ്ഞു. ഇന്നു രാവിലെയാണ് സിപിഎമ്മിന്റെ സമ്മേളനത്തിന് എന്താണ് പ്രത്യേകതയെന്ന് കോടതി ചോദിച്ചത്. കോവിഡ് നിയന്ത്രണ ഉത്തരവ് പിന്വലിച്ച കാസര്ഗോഡ് ജില്ലാ കളക്ടറുടെ നടപടി ചോദ്യം ചെയ്തുകൊണ്ടുള്ള പൊതുതാല്പ്പര്യ ഹര്ജിയിലാണ് കോടതി ഇടപെടല്. നിലവിലെ മാനദണ്ഡം യുക്തിസഹം ആണോയെന്നും നിയന്ത്രണങ്ങള് സംബന്ധിച്ച സര്ക്കാര് ഉത്തരവില് വ്യക്തതയില്ലെന്നും കോടതി വ്യക്തമാക്കി.
ഇന്നാണ് കാസര്ഗോഡ് ജില്ലാ സമ്മേളനം ആരംഭിച്ചത്. കൊവിഡ് രോഗബാധ രൂക്ഷമാവുമ്പോഴും ജില്ലാ സമ്മേളനങ്ങളുമായി മുന്നോട്ട് പോവുന്നത് സിപിഎം നിലപാടിന് എതിരെ വ്യാപക വിമര്ശനം ഉയര്ന്നിരുന്നു. പ്രതിപക്ഷ പാര്ട്ടികള് ഉള്പ്പടെ സിപിഎമ്മിന് എതിരെ രംഗത്ത് എത്തിയിരുന്നു. പിന്നാലെയാണ് നടപടി. സര്ക്കാര് നിയന്ത്രണങ്ങള് പ്രഖ്യാപിച്ചതിന് പിന്നാലെ വ്യാഴാഴ്ച കാസര്കോട് പൊതുപരിപാടികള്ക്ക് ജില്ലാ കളക്ടര് വിലക്കേര്പ്പെടുത്തുകയും പിന്നീട് ഉത്തരവ് പിന്വലിച്ചതും വിവാദമായിരുന്നു.
