പാലക്കാട്: വാളയാര്‍ കേസില്‍ അന്വേഷണ ഉദ്യോഗസ്ഥനായിരുന്ന ഡിവൈഎസ്പി എം.ജെ. സോജന്‍ വ്യാജ മൊഴി നല്‍കാന്‍ നിര്‍ബന്ധിച്ചതായി അമ്മയുടെ പുതിയ വെളിപ്പെടുത്തല്‍. മൂത്ത പെണ്‍കുട്ടിയുടെ അഞ്ചാം ചരമവാര്‍ഷിക ദിനമായ ഇന്നലെയായിരുന്നു അമ്മ ഇക്കാര്യം പുറത്തുവിട്ടത്.
രണ്ട് പ്രതികള്‍ പീഡിപ്പിക്കുന്നത് കണ്ടെന്ന് വ്യാജമൊഴി നല്‍കാന്‍ സോജന്‍ നിര്‍ബന്ധിച്ചു. കേസ് വിജയിക്കാന്‍ ഈ മൊഴി ആവശ്യമാണെന്ന് അദ്ദേഹം പറഞ്ഞതായും അമ്മ പ്രതികരിച്ചു. ഇക്കാര്യങ്ങള്‍ സിബിഐ ഉദ്യോഗസ്ഥരോട് പറഞ്ഞിരുന്നുവെന്നും, കേസില്‍ തന്നെ നുണപരിശോധനക്ക് വിധേയമാക്കണമെന്നാവശ്യപ്പെട്ട് ഹൈക്കോടതിയെ സമീപിക്കുമെന്നും അമ്മ പറഞ്ഞു.
നിരന്തരമായ ശാരീരിക പീഡനത്തെ തുടര്‍ന്ന് സഹോദരിമാര്‍ ആത്മഹത്യ ചെയ്തുവെന്ന പോലീസ് നിഗമനം ശരിവച്ചാണ് സിബിഐയുടെ കുറ്റപത്രവും. സിബിഐയും രണ്ടാമത്തെ കുട്ടിയുടേത് കൊലപാതകമല്ലെന്ന് പറയുന്ന സാഹചര്യത്തില്‍ ശക്തമായ സമരപരിപാടികളുമായി മുന്നോട്ടുപോകും. ഇളയ പെണ്‍കുട്ടിയെ കൊലപ്പെടുത്തിയതാണെന്ന നിലപാടില്‍ ഉറച്ചുനില്‍ക്കുന്നതായും അവര്‍ പ്രതികരിച്ചു.
അതേസമയം നീതി ആവശ്യപ്പെട്ടുള്ള സമരം തുടരാനാണ് സമരസമിതിയുടെ തീരുമാനം. 2017 ജനുവരി 13നാണ് മൂത്ത പെണ്‍കുട്ടിയെ ദുരൂഹ സാഹചര്യത്തില്‍ തൂങ്ങിമരിച്ച നിലയില്‍ കണ്ടെത്തിയത്.
