ന്യൂദല്‍ഹി: പഞ്ചാബില്‍ പ്രധാനമന്ത്രിയ്‌ക്ക് സുരക്ഷാവീഴ്ചുയുണ്ടായ സംഭവം അന്വേഷിക്കാന്‍ മുന്‍ സുപ്രീംകോടതി ജഡ്ജിയുടെ നേതൃത്വത്തില്‍ ഒരു സ്വതന്ത്ര അന്വേഷണസംഘത്തെക്കൊണ്ട് അന്വേഷിപ്പിക്കാമെന്ന് സുപ്രീംകോടതി സമ്മതിച്ചു. ചീഫ് ജസ്റ്റിസ് എന്‍.വി. രമണ, ജസ്റ്റിസുമാരായ സൂര്യ കാന്ത്, ഹിമ കോഹ് ലി എന്നിവര്‍ അംഗങ്ങളായ ബെഞ്ചാണ് ഈ ഉത്തരവിട്ടത്.
മുന്‍ സുപ്രിംകോടതി ജഡ്ജി നേതൃത്വം നല്‍കുന്ന സ്വതന്ത്ര സമിതിയായിരിക്കും പ്രധാനമന്ത്രിയുടെ സുരക്ഷാവീഴ്ചയെക്കുറിച്ച് അന്വേഷിക്കുക. കേന്ദ്രത്തിനോടും പഞ്ചാബ് സര്‍ക്കാരിനോടും ഈ പ്രശ്‌നത്തില്‍ സ്വന്തം അന്വേഷണവുമായി മുന്നോട്ട് പോകരുതെന്നും സുപ്രീംകോടതി അഭ്യര്‍ത്ഥിച്ചു. സ്വതന്ത്രസമിതിയില്‍ ചണ്ഡീഗഢ് ഡിജിപി, എന്‍ ഐഎ ഐജി, പഞ്ചാബ് ആന്‍റ് ഹരിയാന ഹൈക്കോടതിയുടെ രജിസ്ട്രാര്‍ ജനറല്‍, പഞ്ചാബിലെ സുരക്ഷാചുമതലയുള്ള എഡിജിപി എന്നിവരെയും ഉള്‍പ്പെടുത്താനും സുപ്രീം കോടതി നിര്‍ദേശിച്ചു.
ലോയേഴ്‌സ് വോയ്‌സ് എന്ന സംഘടനയാണ് ഒരു സ്വതന്ത്ര അന്വേഷണ സംഘത്തെക്കൊണ്ട് പ്രധാനമന്ത്രിയുടെ സുരക്ഷാവീഴ്ചയെക്കുറിച്ച് അന്വേഷണിക്കണമെന്നാവശ്യപ്പെട്ട് സുപ്രീംകോടതിയെ സമീപിച്ചത്.
ജനവരി അഞ്ചിനാണ് പ്രധാനമന്ത്രി മോദി സുരക്ഷാ വീഴ്ച മൂലം പഞ്ചാബിലെ ഫിറോസ്പൂരില്‍ റാലിയില്‍ പങ്കെടുക്കാനുള്ള തീരുമാനം റദ്ദാക്കിയത്. മോശം കാലാവസ്ഥ കാരണം വിമാനത്തിന് പകരം റോഡ് വഴി ഹുസൈന്‍വാലയിലെ ദേശീയ രക്തസാക്ഷി സ്മാരകത്തിലേക്ക് യാത്രചെയ്യുമ്പോഴാണ് പ്രധാനമന്ത്രിയുടെ അകമ്പടി വാഹനം ഒരു ഫ്‌ളൈ ഓവറില്‍ 15 മുതല്‍ 20 മിനിറ്റോളം കുടുങ്ങിയത്. ചില കര്‍ഷക പ്രക്ഷോഭകര്‍ വഴി തടഞ്ഞതിനെ തുടര്‍ന്നായിരുന്നു ഇത്. പ്രധാനമന്ത്രിയുടെ ജീവന് തന്നെ ഏറെ ഭീഷണി ഉയര്‍ത്തുന്നതായിരുന്നു ഈ സംഭവം.
ഇത്തരം അടിയന്തരഘട്ടത്തില്‍ പ്രധാനമന്ത്രിയെ സംരക്ഷിക്കാന്‍ മതിയായ സുരക്ഷാ സംവിധാനങ്ങള്‍ ഏര്‍പ്പെടുത്തിയിരുന്നില്ലെന്നാണ് പഞ്ചാബ് പൊലീസിനെ കേന്ദ്ര ആഭ്യന്തരമന്ത്രാലയം കുറ്റപ്പെടുത്തുന്നത്. ഇപ്പോള്‍ കേന്ദ്ര ആഭ്യന്തരമന്ത്രാലയവും പഞ്ചാബിലെ കോണ്‍ഗ്രസ് സര്‍ക്കാരും പ്രധാനമന്ത്രിയുടെ സുരക്ഷാവീഴ്ചയെപ്പറ്റി അന്വേഷിക്കാന്‍ വേറെ വേറെ സമിതികളെ നിയോഗിച്ചിരിക്കുകയാണ്. എന്നാല്‍ ഇത്തരം അന്വേഷണങ്ങളുമായി മുന്നോട്ട് പോകരുതെന്ന് കേന്ദ്രത്തോടും പഞ്ചാബ് സര്‍ക്കാരിനോടും അഭ്യര്‍ത്ഥന നടത്തിയിരിക്കുകയാണ് സുപ്രീംകോടതി. കോടതി തന്നെ ഒരു സ്വതന്ത്ര അന്വേഷണകമ്മീഷനെ നിയോഗിച്ച പശ്ചാത്തലത്തിലാണ് ഈ അഭ്യര്‍ത്ഥന.
പ്രതികരിക്കാൻ ഇവിടെ എഴുതുക: