കാഞ്ഞാണി: നായ്‌ക്കളുടെ കടിയേറ്റ് ഗുരുതരമായി പരിക്ക് പറ്റി കാൽ മുറിച്ച് മാറ്റേണ്ടി വന്ന തങ്ങളുടെ പൊന്നോമനയായ പശുക്കുട്ടിക്ക് സ്നേഹ പരിചരണങ്ങൾക്കിടെ വീട്ടുകാർ കൃത്രിമക്കാൽ വച്ചു പിടിപ്പിച്ചു. നീണ്ട നാളത്തെ ഇടവേളക്ക് ശേഷം തൊഴുത്തിന് പുറത്തേക്ക് അവൾ പുതിയ വെപ്പ് കാലിന്റെ സഹായത്തോടെ മെല്ലെ നടന്നപ്പോൾ അവസാനിക്കുന്നത് രണ്ട് വർഷത്തെ ദുരിത നാളുകളാണ്.
മണലൂർ കുണ്ടുകുളം ഡേവീസിന്റേതാണ് വെച്ചൂർ ഇനത്തിലുള്ള മണിക്കുട്ടി എന്ന് പേരുള്ള പശുക്കുട്ടി. വർഷങ്ങൾക്ക് മുൻപ് പറമ്പിൽ കെട്ടിയിട്ടിരുന്ന പശുവിനെ തെരുവ് നായ്‌ക്കൾ കൂട്ടം ചേർന്ന് ആക്രമിക്കുകയായിരുന്നു. മണിക്കുട്ടിയുടെ പുറകിലെ ഒരു കാലിനേറ്റ പരിക്ക് ഗുരുതരമായി പഴുപ്പ് ബാധിച്ചതോടെ വെറ്റിനറി ഡോക്ടറുടെ നിർദ്ദേശാനുസരണം മുട്ടിന് താഴേക്ക് കാൽ മുറിച്ചു മാറ്റി. മൂന്നു കാലിൽ പശുവിന് ഗർഭധാരണം ബുദ്ധിമുട്ടാകും എന്നതിനാൽ ദയാവധമാണ് അഭികാമ്യമെന്ന് ഡോക്ടർമാർ ഉൾപ്പെടെയുള്ളവർ നിർദേശിച്ചിരുന്നു.
പശുവിനെ അറക്കാൻ കൊടുക്കുകയാണ് നല്ലതെന്ന് പലരും പറഞ്ഞെങ്കിലും തങ്ങളുടെ ഓമന മൃഗത്ത കൈവിടാൻ ഡേവീസും കുടുംബവും തയ്യാറായിരുന്നില്ല. ഇതിനിടെ കോവിഡ് രൂക്ഷമായതോടെ കൃത്രിമക്കാൽ പിടിപ്പിക്കുക എന്നത് വലിയ പ്രതിസന്ധിയായിരുന്നു. കൃത്രിമക്കാൽ നിർമ്മിച്ചെടുക്കാൻ ഒരു വർഷത്തിലധികം സമയമെടുത്തു. അതു വരെ മണിക്കുട്ടിക്ക് വേണ്ട സംരക്ഷണം ഡേവീസും കുടുംബവും ഒരുക്കി.
തൃശൂരിലെ സ്വകാര്യ കമ്പനിയാണ് കൃത്രിമക്കാൽ നിർമ്മിച്ചത്. ലാഭം ഒഴിവാക്കി നിർമ്മാണ ചിലവ് മാത്രമാണ് കമ്പനി ഇവരിൽ നിന്ന് വാങ്ങിയത്. വർഷങ്ങൾക്ക് ശേഷം കഴിഞ്ഞ ദിവസം കൃത്രിമക്കാൽ പിടിപ്പിച്ചതോടെ മണികുട്ടി തൊഴുത്തിൽ നിന്നും പുറത്തിറങ്ങി ജീവിതത്തിലേക്ക് നടന്നു. ഡേവീസിനൊപ്പം ഭാര്യ ഉഷ, മകൾ ദൃശ്യ എന്നിവരാണ് മണിക്കുട്ടിയെ പരിചരിക്കാൻ കൂടെ ഉണ്ടായിരുന്നത്.
പ്രതികരിക്കാൻ ഇവിടെ എഴുതുക: