ഇടുക്കി: മൂന്നാറില് വ്യാജപട്ടയം നിയമ വിധേയമാക്കാന് കൈക്കൂലി വാങ്ങാന് ശ്രമിച്ച കേസില് കര്ശന നടപടി. കൈക്കൂലി ഇടപാടിന്റെ ദൃശ്യങ്ങള് പുറത്തായതോടെ രണ്ട് തഹസില്ദാര്മാരേയും ജില്ലയ്ക്ക് വെളിയിലേക്ക് സ്ഥലമാറ്റി ലാന്റ് റവന്യൂ കമ്മീഷണറുടെ ഉത്തരവ്. സര്വേയര്ക്കെതിരേയും ഉടന് നടപടി.
ദേവികുളം തഹസില്ദാര് ആര്. രാധാകൃഷ്ണനെ എറണാകുളം ജില്ലയിലേക്കും മൂന്നാര് സ്പെഷ്യല് തഹസില്ദാര് പി.പി. ജോയിയെ കൊല്ലം ജില്ലയിലേക്കുമാണ് സ്ഥലം മാറ്റിയത്. നേരത്തെ ഇരുവരേയും ജില്ലാ കളക്ടര് സ്ഥലമാറ്റിയിരുന്നു. ഇതിന് പിന്നാലെയാണ് പുതിയ ഉത്തരവ് വരുന്നത്. ജീവനക്കാരുടെ പ്രവര്ത്തി ഗുരുതരമായ കൃത്യവിലോപവും അച്ചടക്ക ലംഘനവും ആണെന്നും ഉത്തരവാദിത്തപ്പെട്ട സര്ക്കാര് ഉദ്യോഗസ്ഥനില് നിന്ന് സംഭവിക്കാന് പാടില്ലാത്തതാണെന്നും ഉത്തരവില് പറയുന്നു. ഈ ആരോപണം പൊതുജനങ്ങള്ക്കിടയില് റവന്യൂ ഉദ്യോഗസ്ഥര്ക്കിടയിലും തെറ്റായ സന്ദേശം നല്കുകയും അവമതിപ്പ് ഉണ്ടാക്കുകയും ചെയ്യുകയും വകുപ്പിന്റെ സല്പ്പേരും സര്ക്കാരിന്റെ പ്രതിച്ഛായക്കും കോട്ടം വരുത്തുന്നതുമാണ്.
ഇന്നലെ തന്നെ ഇവരെ തസ്തികയില് നിന്ന് മാറ്റാന് കളക്ടര് ശ്രദ്ധിക്കണമെന്നും പുതിയ ജില്ലയില് പൊതുജനങ്ങളുമായി സമ്പര്ക്കമില്ലാത്ത തസ്തികയിലേക്ക് നിയമനം നല്കണമെന്നും ഇതിന്റെ പകര്പ്പ് ഉടന് കൈമാറമെന്നും ഉത്തരവിലുണ്ട്. സര്വേ ആന്് ലാന്ഡ് റെക്കോര്ഡ് ഡയറക്ടര് സര്വേയര് ഉദയകുമാറിനെതിരെ ഉചിതമായ നടപടി സ്വീകരിച്ച് രണ്ട് ദിവസത്തിനകം റിപ്പോര്ട്ട് നല്കണമെന്നും നിര്ദേശമുണ്ട്.
ആനവിരട്ടി വില്ലേജിലെ മൂന്ന് പട്ടയ നമ്പറുകള് ക്രമപ്പെടുത്താന് ഉദ്യോഗസ്ഥരും ഇടനിലക്കാരനും തമ്മില് നടന്ന ചര്ച്ചയുടെ ദൃശ്യങ്ങളാണ് പുറത്തായത്. തമിഴ്നാട് സ്വദേശി ഡോ ആനന്ദിന്റെ ഉടമസ്ഥതയിലുള്ള ഭൂമി ക്രമവിരുദ്ധമായി പോക്ക് വരവ് ചെയ്യുന്നതിന് ഈ ഉദ്യോഗസ്ഥര് ഇടപെടുകയും ഇതിനായി നാല് ലക്ഷം രൂപയുടെ കൈക്കൂലി വാങ്ങിയെന്നുമാണ് ദൃശ്യങ്ങളിലൂടെ പുറത്ത് വന്നത്. മൂന്നാറിലെ കൈയേറ്റം തടയുന്നതിനും വ്യാജ പട്ടയങ്ങള് കണ്ടെത്തുന്നതിനുമായി നിയോഗിക്കപ്പെട്ട ഉദ്യോഗസ്ഥനാണ് സ്പെഷ്യല് തഹസില്ദാര് പി.പി. ജോയി. ഇതിന് മുമ്പും ഇയാള് വഴിവിട്ട ഇടപാടുകള് നടത്തി നടപടി നേരിട്ടയാളാണ്.
