കാട്ടയം: ശബരിമല തീര്ത്ഥാടനം കഴിഞ്ഞ് വീട്ടിലേക്ക് മടങ്ങുകയായിരുന്ന അച്ഛനും മകനും മദ്യപസംഘത്തിന്റെ ക്രൂര മര്ദ്ദനം. മര്ദനത്തില് പരിക്കേറ്റ തിരുവഞ്ചൂര് എസ്.ആര്. സദനം പി.എസ്. സാബു (61), മകന് അജിത് (25) എന്നിവരെ ജില്ലാ ആശുപത്രില് പ്രവേശിപ്പിച്ചു.
ഞായറാഴ്ച വൈകിട്ട് 5.30ന് എംസി റോഡില് വട്ടമൂട് പാലം ജങ്ഷനിലാണ് സംഭവം. ശബരിമല ദര്ശനം കഴിഞ്ഞു കോട്ടയത്തെത്തി സ്കൂട്ടറില് വീട്ടിലേക്കു മടങ്ങുകയായിരുന്നു സാബുവും മകനും. നാഗമ്പടം ഭാഗത്തു നിന്നുമെത്തി വട്ടമൂടിലേക്കു തിരിയുമ്പോള്, എതിരേ വന്ന വെള്ള നിറമുള്ള കാര് തട്ടി. ഇരുമുടിക്കെട്ടുമായി രണ്ടു പേരും റോഡിലേക്കു വീണു. ഇവര് എഴുന്നേല്ക്കുന്നതിനിടെ, അസഭ്യ വര്ഷം മുഴക്കി കാറിലുണ്ടായിരുന്ന യുവാക്കള് നാഗമ്പടം ഭാഗത്തേയ്ക്കു പോയി. യുവാക്കള് അല്പ്പ സമയം കഴിഞ്ഞപ്പോള് തിരികെയെത്തി വട്ടമൂട് പാലം ഭാഗത്തേയ്ക്കു പോയപ്പോഴും അസഭ്യവര്ഷം തുടര്ന്നു. ഓടിക്കൂടിയവര് വിവരമറിയച്ചതിനെത്തുടര്ന്നു പോലീസ് എത്താന് കാത്തുനില്ക്കുകയായിരുന്നു സാബുവും അജിത്. ഏതാനും നിമിഷങ്ങള്ക്കകം യുവാക്കളുടെ സംഘം മടങ്ങിയെത്തി സാബൂവിനെ ക്രൂരമായി മര്ദിക്കുകയായിരുന്നു.
സമീപത്തെ വ്യാപാര സ്ഥാപനതിന്റെ ചുവരിനോടു ചേര്ത്തു നിര്ത്തിയാണു നാലു പേരടങ്ങുന്ന സാബുവിനെ മര്ദിച്ചത്. തടയാന് ചെന്ന മകനെയും മര്ദിച്ചു. തടയാനെത്തിയവരെയും യുവാക്കള് അസഭ്യവര്ഷത്തോടെ ഭീഷണിപ്പെടുത്തി. ബര്മുഡയും ടീ ഷര്ട്ടും ധരിച്ച യുവാക്കള് മദ്യലഹരിയിലായിരുന്നുവെന്നു സാക്ഷികള് പറയുന്നു. തുടര്ന്നു നട്ടാശേരി ഭാഗത്തേയ്ക്കു പോയ സംഘത്തിനായി കണ്ട്രോള് റൂം പോലീസും ഗാന്ധിനഗര് പോലീസും ചേര്ന്നു നടത്തിയ തെരച്ചിലില് പിടിയിലായി. ഗാന്ധിനഗര് പോലീസ് കേസെടുത്തു.
