തിരുവനന്തപുരം: ഒമിക്രോണ് വളരെ വേഗത്തില് പടര്ന്നുപിടിക്കുന്നതിനാല് ആള്ക്കൂട്ടം പരമാവധി ഒഴിവാക്കണമെന്ന് സംസ്ഥാന ആരോഗ്യ വകുപ്പ്. പൊതുസ്ഥലങ്ങളിലോ പൊതു ചടങ്ങിലോ പങ്കെടുക്കുമ്പോള് എന് 95 മാസ്ക് ഉപയോഗിക്കണം. മാസ്ക് മാറ്റി സംസാരിക്കുകയോ ഗ്രൂപ്പ് ഫോട്ടോയെടുക്കുകയോ ചെയ്യരുത്. ഭക്ഷണം കഴിക്കുമ്പോള് അകലം പാലിച്ചിരുന്ന് കഴിക്കാന് പ്രത്യേകം ശ്രദ്ധിക്കണം.
അടച്ചിട്ട സ്ഥലങ്ങള് രോഗവ്യാപനത്തിന് കാരണമായതിനാല് മുറികളിലും ഹാളുകളിലും വായു സഞ്ചാരം ഉറപ്പാക്കണം. ഇനിയും അടച്ചുപൂട്ടല് സാധ്യമല്ല. ക്വാറന്റൈനിലുള്ളവരും സ്വയം നിരീക്ഷണത്തിലുള്ളവരും ആള്ക്കൂട്ടത്തിലോ പൊതുചടങ്ങുകളിലോ പരിപാടികളിലോ പങ്കെടുക്കാന് പാടില്ല.
അവര് നിരീക്ഷണ കാലയളവില് വീട്ടില് നിന്ന് പുറത്തിറങ്ങരുത്. ക്വാറന്റൈന് കാലയളവില് ആ വീട്ടില് മറ്റ് ബന്ധുക്കളും സുഹൃത്തുക്കളുമായുള്ള ഒത്തുകൂടലുകള് ഒഴിവാക്കണം. വാക്സിന് എടുക്കാന് ബാക്കിയുള്ളവര് അടിയന്തരമായി വാക്സിനെടുക്കണമെന്നും ആരോഗ്യ വകുപ്പ് നിര്ദേശിച്ചു.
