കൊച്ചി: സംസ്ഥാന ജൂനിയര് സെപക്താക്രോ മത്സരങ്ങള് എറണാകുളം കടവന്ത്ര ഇന്ഡോര് സ്റ്റേഡിയത്തില് തുടങ്ങി. ആണ്കുട്ടികളുടെ വിഭാഗം ടീം ഇനത്തില് കാസര്കോട്, പാലക്കാട്, തൃശൂര്, മലപ്പുറം ടീമുകള് സെമിഫൈനലില് കടന്നു. പാലക്കാട്, കോഴിക്കോട്, തൃശൂര്, കാസര്കോട് ടീമുകളാണ് പെണ്കുട്ടികളുടെ വിഭാഗത്തില് സെമിയില് കടന്നത്.
രഗു ഇനത്തില് പ്രാഥമിക റൗണ്ട് മത്സരങ്ങളാണ് ഇന്നലെ നടന്നത്. ഫൈനല് മത്സരങ്ങള് ഇന്ന്. സെപക്താക്രോ അസോസിയേഷന് ഓഫ് കേരളയും എറണാകുളം ജില്ലാ അസോസിയേഷനും സംയുക്തമായാണ് ചാമ്പ്യന്ഷിപ്പിന്റെ 16-ാം പതിപ്പ് സംഘടിപ്പിക്കുന്നത്. കൊച്ചി മേയര് അഡ്വ. എം. അനില് കുമാര് ചാമ്പ്യന്ഷിപ്പ് ഉദ്ഘാടനം ചെയ്തു.
രഗു ഇനത്തില് ഒരു ടീമില് അഞ്ച് പേരാകും ഉണ്ടാവുക. ഒരു സമയത്ത് മൂന്ന് പേര്ക്ക് കളിക്കാം. രണ്ട് പേര് സബ്ബായി കളിക്കും. ടീം ഇനത്തില് 15 പേരടങ്ങുന്ന സംഘമാകും എത്തുക. മൂന്ന് സെറ്റുകള് ഉണ്ടാകും. കൂടുതല് സെറ്റ് നേടുന്ന ടീം വിജയിക്കും. ഒരു സെറ്റില് കളിച്ചവര്ക്ക് അതേ മത്സരത്തിലെ അടുത്ത സെറ്റില് കളിക്കാനാകില്ല. മൂന്ന് സെറ്റുകളിലും പല താരങ്ങള് കളത്തിലിറങ്ങണം. ആകെ ഒമ്പത് പേര്. ആറ് പേര്ക്ക് സബ്ബായി കളിക്കാം. വിദേശ രാജ്യങ്ങളില് ആഘോഷത്തോടെ കളിക്കുന്ന മത്സരങ്ങള്ക്ക് കേരളത്തില് അടുത്ത കാലത്താണ് പിന്തുണ ലഭിച്ച് തുടങ്ങിയത്. നിലവില് സ്പോര്ടസ് കൗണ്സിലിന്റെ അംഗീകാരവും സെപക്താക്രോ മത്സരങ്ങള്ക്കുണ്ട്.
