അഞ്ചാലുംമൂട്: സബ് രജിസ്ട്രാര് ആഫീസ് അഞ്ചാലുംമൂട്ടില് തന്നെ നിലനിര്ത്തണമെന്ന് ആധാരം എഴുത്ത് അസോസിയേഷന് അഞ്ചാലുംമൂട് യൂണിറ്റ് കമ്മിറ്റി. തേവള്ളിയിലെ ബാര് ഹോട്ടലിന് സമീപത്തുള്ള സര്ക്കാര് പുറമ്പോക്കിലേക്ക് ഓഫീസ് മാറ്റി സ്ഥാപിക്കുന്നതിനുള്ള നടപടികളുടെ ഭാഗമായി ജില്ലാ രജിസ്ട്രാറുടെയും അഞ്ചാലുംമൂട് സബ് രജിസ്ട്രാറുടെയും തൃക്കടവൂര് വില്ലേജ് ആഫീസറുടെയും നേതൃത്വത്തില് സ്ഥല പരിശോധന നടത്തി തുടര്നടപടികള് സ്വീകരിച്ചുവരികയാണ്.
തൃക്കരുവ, തൃക്കടവൂര് വില്ലേജുകളുടെ സംഗമ സ്ഥാനത്ത് നിലനില്ക്കുന്ന ആഫീസ് തേവള്ളിയിലേക്ക് മാറിയാല് ആധാര രജിസ്ട്രേഷനും മറ്റുമായി പൊതുജനങ്ങള്ക്ക് കിലോമീറ്ററുകള് യാത്രചെയ്യേണ്ട അവസ്ഥയുണ്ടാകും.നിലവില് ആഫീസ് പ്രവര്ത്തിക്കുന്ന ചിറ്റുമല ബ്ലോക്ക് പഞ്ചായത്തിന്റെ അധീനതയിലുള്ള കെട്ടിടത്തിന് വാടക കൊടുത്താണ് പ്രവര്ത്തിക്കുന്നത്.
കെട്ടിട വാടകയില് നിന്നും ഒഴിവാക്കുകയോ അല്ലെങ്കില് കെട്ടിടത്തിന് സമീപം പഴയ ബ്ലോക്ക് ആഫീസ് പ്രവര്ത്തിച്ചിരുന്ന കെട്ടിടം രജിസ്ട്രാറാഫീസിന് വിട്ടുനല്കുന്നതിനുള്ള നടപടികള് ഉദ്യോഗസ്ഥ-രാഷ്ട്രീയ തലത്തില് നിന്നും ഉണ്ടാകണമെന്നും യോഗം ആവശ്യപ്പെട്ടു. ആഫീസ് അഞ്ചാലുംമൂട്ടില് തന്നെ നിലനിര്ത്താനുള്ള നടപടികള് ഉണ്ടായില്ലെങ്കില് പ്രത്യക്ഷ സമരപരിപാടികള് ഉള്പ്പടെ തുടങ്ങുമെന്നും ഭാരവാഹികള് അറിയിച്ചു.
