ന്യൂദല്ഹി : ബിജെപി എംപിയും മുന് ഇന്ത്യന് ക്രിക്കറ്റ് താരവുമായ ഗൗതം ഗംഭീറിന് വീണ്ടും വധഭീഷണി. ഐഎസ്ഐഎസ് കശ്മീരിന്റെ പേരിലാണ് ഇന്നും വധഭീഷണി മുഴക്കിയിരിക്കുന്നത്. ഈ മാസം 24നും ഗൗതം ഗംഭീറിന് വധഭീഷണി വന്നിരുന്നു. ഇതുമായി ബന്ധപ്പെട്ട് ദല്ഹി പോലീസ് അന്വേഷണം നടത്തിവരികയാണ്. അതിനിടെയാണ് വീണ്ടും വധഭീഷണി പുറത്തുവന്നിരിക്കുന്നത്. ഒരാഴ്ചയ്ക്കുള്ളില് ഇത് മൂന്നാമത്തെ ഭീഷണിയാണ്.
ഞങ്ങള് നിങ്ങളെ കൊല്ലണമെന്ന ഉദ്ദേശത്തില് തന്നെയാണുണ്ടായിരുന്നത്. പക്ഷേ ഇന്നലെ നിങ്ങള് രക്ഷപ്പെട്ടു. നിങ്ങള് കുടുംബത്തേയും ജീവിതത്തേയും ഇഷ്ടപ്പെടുന്നുവെങ്കില് രാഷ്ട്രീയത്തില് നിന്നും കശ്മീര് പ്രശ്നങ്ങളില് നിന്നും അകന്നു നില്ക്കുക’ എന്നാനായിരുന്നു സന്ദേശം. ഐഎസ്ഐഎസ് കശ്മീര് എന്ന മെയില് ഐഡിയില് നിന്നുമാണ് ഗംഭീറിന് രണ്ടാം തവണ ഭീഷണി സന്ദേശം ലഭിച്ചത്.
ഗൗതം ഗംഭീറിന്റെ ദല്ഹിയിലെ വസതിയുടെ പുറത്ത് നിന്നുള്ള വീഡിയോ ദൃശ്യങ്ങള് അടക്കമുള്ള ദൃശ്യങ്ങളും ഇവര് അയച്ചു നല്കിയിട്ടുണ്ട്.
ഞങ്ങള് നിങ്ങളേയും കുടുംബത്തേയും കൊല്ലാന് പോകുന്നു’വെന്നായിരുന്നു 24ന് ലഭിച്ച ആദ്യ സന്ദേശം. ചൊവ്വാഴ്ച രാത്രി 9.30 നായിരുന്നു ആദ്യത്തെ ഭീഷണി സന്ദേശം ലഭിച്ചത്. പരാതി നല്കിയതിനെ തുടര്ന്ന് ഗൗതം ഗംഭീറിന്റെ വീടിന് സുരക്ഷ വര്ധിപ്പിച്ചു. സംഭവത്തില് കേസ് രജിസ്റ്റര് ചെയ്ത് അന്വേഷണം ആരംഭിച്ചതായി ദല്ഹി സെന്ട്രല് ഡിസിപി ശ്വേത ചൗഹാനും അറിയിച്ചിരുന്നു.
ഗംഭീറിന്റെ ഔദ്യോഗിക ഇ മെയിലിലേക്കാണ് ഭീഷണി സന്ദേശം എത്തിയത്. ഗംഭീറിന് എന്തുകൊണ്ടാണ് ഭീഷണി സന്ദേശം അയച്ചതെന്ന് വ്യക്തമല്ല. കഴിഞ്ഞ ബുധനാഴ്ച ഗൗതം ഗംഭീറിന് ലഭിച്ച വധ ഭീഷണി പാക്കിസ്ഥാനില് നിന്നാണെന്ന് പോലീസ് കണ്ടെത്തിയിരുന്നു.
2018ലാണ് ഗംഭീര് ക്രിക്കറ്റില് നിന്ന് വിരമിച്ചത്. പിന്നീട് രാഷ്ട്രീയത്തില് സജീവമായി. 2019ല് എംപിയായി തെരഞ്ഞെടുക്കപ്പെട്ടു. ഈസ്റ്റ് ദില്ലിയില് നിന്നാണ് ഗൗതം ഗംഭീര് എംപിയായി തെരഞ്ഞെടുക്കപ്പെട്ടത്.
