തിരുവനന്തപുരം: ഇടത് ജിഹാദി കൂട്ടുകെട്ടിനെതിരെ സംസ്ഥാന വ്യാപകമായി ബിജെപി പ്രതിഷേധ പരിപാടികള്‍ നടത്തി. എസ്ഡിപിഐ തീവ്രവാദികള്‍ ക്രൂരമായി കൊലപ്പെടുത്തിയ സഞ്ജിത്തിന്റെ കൊലപാതകം എന്‍ഐഎ അന്വേഷിക്കണം എന്നാവശ്യപ്പെട്ട് എറണാകുളത്ത് നടന്ന പ്രതിഷേധ സംഗമം സംസ്ഥാന അധ്യക്ഷന്‍ കെ.സുരേന്ദ്രന്‍ ഉദ്ഘാടനം ചെയ്തു.
കേരളത്തില്‍ ഗ്രാമനഗര വ്യത്യാസമില്ലാതെ ഇസ്ലാമിക ഭീകരവാദ ശക്തികള്‍ സമൂഹത്തിന്റെ എല്ലാ മേഖലകളിലും പിടിമുറുക്കി കൊണ്ടിരിക്കുകയാണ്. രാജ്യത്തിനെതിരായ വിദ്വേഷ പ്രചരണവും രാജ്യത്തെ തകര്‍ക്കാനുള്ള ആസൂത്രണവും കേരളത്തില്‍ നിര്‍ബാധം നടക്കുകയാണെന്നും അദ്ദേഹം പറഞ്ഞു.
കാസര്‍ഗോഡ് കളക്ട്രേറ്റിലേക്ക് നടത്തിയ മാര്‍ച്ച് മുന്‍ സംസ്ഥാന അധ്യക്ഷന്‍ സി.കെ പത്മനാഭന്‍ ഉദ്ഘാടനം ചെയ്തു. കണ്ണൂരില്‍ സംസ്ഥാന സെക്രട്ടറി കെ.പി പ്രകാശ് ബാബുവും വയനാട് യുവമോര്‍ച്ചാ സംസ്ഥാന അധ്യക്ഷന്‍ സി.ആര്‍ പ്രഫുല്‍ കൃഷ്ണനും കോഴിക്കോട് സംസ്ഥാന വക്താവ് സന്ദീപ് വചസ്പതിയും പ്രതിഷേധത്തിന് നേതൃത്വം നല്‍കി.
മലപ്പുറത്ത് സംസ്ഥാന ഉപാധ്യക്ഷന്‍ ബി.ഗോപാലകൃഷ്ണനും പാലക്കാട് മുന്‍ സംസ്ഥാന അധ്യക്ഷന്‍ കുമ്മനം രാജശേഖരനും കളക്ട്രേറ്റ് മാര്‍ച്ച് ഉദ്ഘാടനം ചെയ്തു. പാലക്കാട് സംസ്ഥാന ജനറല്‍സെക്രട്ടറി സി.കൃഷ്ണകുമാറും പങ്കെടുത്തു. തൃശ്ശൂരില്‍ സംസ്ഥാന ജനറല്‍സെക്രട്ടറി എംടി രമേശ്, കോട്ടയത്ത് ഉപാധ്യക്ഷന്‍ ഡോ.കെ.എസ് രാധാകൃഷ്ണന്‍, ആലപ്പുഴ ദേശീയ ഉപാധ്യക്ഷന്‍ എപി അബ്ദുള്ളക്കുട്ടിയും പരിപാടിയുടെ ഉദ്ഘാടനം നടത്തി. ഇടുക്കിയില്‍ സംസ്ഥാന വക്താവ് ടിപി സിന്ധുമോളും പത്തനംത്തിട്ട സംസ്ഥാന സെക്രട്ടറി എസ്.സുരേഷും കൊല്ലത്ത് സംസ്ഥാന ഉപാധ്യക്ഷന്‍ എഎന്‍ രാധാകൃഷ്ണനും കളക്ട്രേറ്റ് മാര്‍ച്ചുകള്‍ ഉദ്ഘാടനം ചെയ്തു.
പ്രതികരിക്കാൻ ഇവിടെ എഴുതുക: