ലിജോ ജോസ് പെല്ലിശ്ശേരിയുടെ പുതിയ ചിത്രമായ ചുരുളി സോണി ലൈവിലൂടെ റിലീസ് ചെയ്യും. ഈ മാസം 19നാണ് ചിത്രം ഒടിടിയിലൂടെ പുറത്തിറങ്ങുക. സംസ്ഥാനത്തെ രാജ്യാന്തര ചലച്ചിത്ര മേളയില്‍ (ഐഎഫ്എഫ്‌കെ) പ്രേക്ഷകരുടെ അഭിപ്രായ വോട്ടെടുപ്പിലൂടെ ചുരുളി മികച്ച ചിത്രത്തിനുള്ള പുരസ്‌കാരം നേടിയിരുന്നു. ഇതേ മേളയില്‍ ചുരുളി മികച്ച സംവിധായകനുള്ള പ്രത്യേക പരാമര്‍ശവും ലിജോയ്‌ക്ക് നേടിക്കൊടുത്തു.
മയിലാടുംപറമ്പില്‍ ജോയ് എന്ന വ്യക്തിയെ അന്വേഷിച്ച് പോകുന്ന കുറച്ച് ആളുകള്‍. അവര്‍ ഭ്രാന്തിന്റെയും ഭയത്തിന്റെയും അന്യഗ്രഹജീവികളുടെയും ഇടയില്‍ പെടുന്നു. ഇതാണ് ചിത്രത്തിന്റെ പ്രമേയം. സയന്‍സ് ഫിക്ഷന്‍, ഹൊറര്‍, ടൈം ലൂപ്പ് എന്നീ വിഭാഗത്തില്‍ ചിത്രത്തെ ഉള്‍പ്പെടുത്താം.
ജോജു ജോര്‍ജ്ജ്, സൗബിന്‍ ഷാഹിര്‍, ദിലീഷ് പോത്തന്‍, വിനയ് ഫോര്‍ട്ട്, ചെമ്പന്‍ വിനോദ്, ജാഫര്‍ ഇടുക്കി, വിജയ് ബാബു, ഗീതി സങ്കീത തുടങ്ങിയവരാണ് ചിത്രത്തില്‍ വേഷമിടുന്നത്. വിനോയ് തോമസിന്റെ കഥയ്‌ക്ക് ഹരീഷ് എസ് ആണ് തിരക്കഥ ഒരുക്കിയിരിക്കുന്നത്. മധു നീലകണ്ഠനാണ് ഛായാഗ്രഹണം. ശ്രീരാഗ് സജിയാണ് സംഗീതം.
