തിരുവല്ല: ജനസംഘത്തിന്റെ ആദ്യകാല നേതാവും സംസ്ഥാന പ്രസിഡന്റും അടിയന്തരാവസ്ഥാ വിരുദ്ധ സമരത്തിന്റെ മുന്നണി പോരാളിയുമായിരുന്ന അഡ്വ. പി.കെ. വിഷ്ണുനമ്പൂതിരി (93) അന്തരിച്ചു. ഇന്നലെ രാവിലെ ഒന്പതരയോടെ തിരുവല്ല പൊടിയാടിയിലെ വസതിയായ മാലിക്കല് മഠത്തിലായിരുന്നു അന്ത്യം.
1960കളില് ജനസംഘത്തില് ആകൃഷ്ടനായ അദ്ദേഹം ആലപ്പുഴ ജില്ലാ പ്രസിഡന്റ് ആയിരിക്കെയാണ് പി. പരമേശ്വര്ജിയുമായി അടുക്കുന്നത്. അടല് ബിഹാരി വാജ്പേയി, എല്.കെ. അദ്വാനി, സുന്ദര്സിങ് ഭണ്ഡാരി, മുരളീ മനോഹര് ജോഷി എന്നിവരുമായി ആത്മബന്ധം പുലര്ത്തി. അടിയന്തരാവസ്ഥക്കാലത്ത് മൂന്നു മാസം തടവുശിക്ഷയ്ക്ക് വിധേയനായി. ജനസംഘം സംസ്ഥാന അധ്യക്ഷനായിരുന്ന ഒ. രാജഗോപാലിന്റെ അറസ്റ്റിന് ശേഷം പട്ടാമ്പിയില് ചേര്ന്ന യോഗത്തില് സംസ്ഥാന അധ്യക്ഷന്റെ ചുമതല ഏറ്റെടുത്തു. പിന്നീട് മിസ പ്രകാരം അറസ്റ്റിലായ അദ്ദേഹത്തെ പതിമൂന്നു മാസം പൂജപ്പുര സെന്ട്രല് ജയിലില് അടച്ചു. അടിയന്തരാവസ്ഥയ്ക്ക് ശേഷമാണ് ജയില് മോചിതനായത്.
ഒരു തവണ തിരുവല്ല നഗരസഭയില് അഴിയിടത്തുചിറ വാര്ഡിനെ പ്രതിനിധീകരിച്ചു. ഭാര്യ: പരേതയായ സരസ്വതി. മക്കള്: വി.എസ്. കൃഷ്ണ കൈമള് (റിട്ട. ചീഫ് മാനേജര് ഇന്ത്യന് ബാങ്ക്), വി.എസ്. ദേവകിയമ്മ (റിട്ട. അധ്യാപിക, കേന്ദ്രീയ വിദ്യാലയം), ഡോ. വി. സാവിത്രിയമ്മ (റിട്ട. പ്രിന്സിപ്പാള്, സികെജി മെമ്മോറിയല് കോളജ്), വി. ഈശ്വര കൈമള് (റിട്ട. എക്സിക്യൂട്ടീവ് ഡയറക്ടര് ഓറിയന്റല് ഇന്ഷുറന്സ് കമ്പനി), ഡോ. വി. സരസ്വതിയമ്മ (ഗൈനക്കോളജിസ്റ്റ്). മരുമക്കള്: ആര്. പ്രേമലത വര്മ (റിട്ട. എസ്ജി തമിഴ്നാട് ട്രഷറി വകുപ്പ്), ആര്. രാജേന്ദ്രന് (റിട്ട. തമിഴ്നാട് ട്രാന്സ്പോര്ട്ട് വകുപ്പ്), പി.കെ. മുരളീധര രാജ (റിട്ട. ഓഫീസര് വൈശ്യ ബാങ്ക്), ആശ വര്മ (റിട്ട. പ്രൊഫ. എന്എസ്എസ് എന്ജിനീയറിങ് കോളജ് പാലക്കാട്), അഡ്വ. രാജീവ്. സംസ്കാരം നാളെ 10.30ന് വീട്ടുവളപ്പില്.
