കാസര്‍കോട്: സാമൂഹിക മാധ്യമങ്ങളെല്‍ ആശയ വിനിമയത്തിന് വൈകാരിക ഭാഷയായി ഉപയോഗിക്കുന്ന ഇമോജികളില്‍ സാംസ്‌കാരിക വൈരുധ്യങ്ങളുണ്ടെന്ന് പഠനം. കാസര്‍കോട് കേന്ദ്ര സര്‍വകലാശാലയിലെ ഗവേഷകരാണ് ഇത് സംബന്ധിച്ച് പഠനം നടത്തിയത്. നമ്മുടെ ഭാവ പ്രകടനത്തിന് ഇപ്പോഴുള്ള ഇമോജികള്‍ പോരെന്നും പഠനം പറയുന്നു.
മറ്റു വിദേശ രാജ്യങ്ങളില്‍ ഉപയോഗിക്കുന്ന മുഖഭാവ, വൈകാരിക പ്രകടനങ്ങളേക്കാള്‍ പതിന്മടങ്ങ് ഭാവങ്ങള്‍ ഇന്ത്യപോലുള്ള രാജ്യങ്ങളില്‍ ഉപയോഗിക്കുന്നുണ്ട്. അവയ്‌ക്ക് അനുയോജ്യമായ ഇമോജികള്‍ ലഭ്യമായിട്ടില്ലെന്ന് പഠനം പറയുന്നു. അതിനാല്‍ വിവിധ സംസ്‌കാരങ്ങളില്‍ ജീവിക്കുന്നവര്‍ നടത്തുന്ന സാമൂഹിക മാധ്യമ വിനിമയങ്ങളില്‍ വലിയ വൈരുധ്യങ്ങളുണ്ടാകുന്നു. നിലവില്‍ വാട്ട്‌സ്ആപ്പില്‍ 3633ഉം ഫേസ്ബുക്കില്‍ 3136ഉം ഇന്‍സ്റ്റഗ്രാമില്‍ 2000വും ട്വിറ്ററില്‍ 3245ഉം ഇമോജികളാണുള്ളത്.
കാസര്‍കോട് കേന്ദ്ര സര്‍വകലാശാലയിലെ ഇംഗ്ലീഷ് ആന്‍ഡ് കംപാരറ്റീവ് ലിറ്ററേച്ചര്‍ വിഭാഗം അസി. പ്രൊഫ ഡോ. ബി ഇഫ്തികാര്‍ അഹമ്മദും ഗവേഷക വിദ്യാര്‍ത്ഥിനി എം. ശ്രീലക്ഷ്മിയുമാണ് ഇത് സംബന്ധിച്ച് പഠനം നടത്തിയത്. സ്‌മൈലി, പിക്‌റ്റോഗ്രാം, ഐഡിയോഗ്രാം, ലോഗോ ഗ്രാം തുടങ്ങിയ ഡിജിറ്റല്‍ ടെക്സ്റ്റുകളെ അധികരിച്ചായിരുന്നു പഠനം. ഗവേഷക ജേര്‍ണലായ കലാസരോവറില്‍ ഇവരുടെ പ്രബന്ധം പ്രസിദ്ധീകരിച്ചിട്ടുണ്ട്.വാട്ട്‌സ് ആപ്പ്, ഫേസ്ബുക്ക്, ഇന്‍സ്റ്റഗ്രാം, ട്വിറ്റര്‍ എന്നിവയിലെ മുഖഭാവ പ്രകടനങ്ങള്‍, ആഘോഷങ്ങള്‍, സ്ഥലങ്ങള്‍, കാലാവസ്ഥ ,വ്യത്യസ്ത തരം സ്‌മൈലികള്‍ തുടങ്ങിയവ മുന്‍നിര്‍ത്തിയാണ് പഠനം നടത്തിയത്. അര്‍ഥവത്തായ കൂടുതല്‍ ഡിജിറ്റല്‍, നോണ്‍ വെര്‍ബല്‍ ഇമോജികള്‍ക്കായുള്ള പഠനം ഇവരുടെ നേതൃത്വത്തില്‍ നടക്കുന്നുണ്ട്.
പ്രതികരിക്കാൻ ഇവിടെ എഴുതുക: