കോഴിക്കോട്: വിദ്യാര്ത്ഥികള്ക്ക് യാത്രാപാസ് അനുവദിച്ചതില് ഉദ്യോഗസ്ഥന് നടത്തിയ ലക്ഷങ്ങളുടെ വെട്ടിപ്പ് പുറത്ത്. കെഎസ്ആര്ടിസി ഓഡിറ്റ് വിഭാഗമാണ് ക്രമക്കേട് കണ്ടെത്തിയത്. കോഴിക്കോട് കെഎസ്ആര്ടിസി ഡിപ്പോയിലെ ടിക്കറ്റ് ഇഷ്യൂവറും സിഐടിയു നേതാവുമായിരുന്ന പി സി ലോഹിതാക്ഷനാണ് തട്ടിപ്പ് നടത്തിയത്. കഴിഞ്ഞ ഏപ്രില് മാസം ഇയാള് സര്വീസില് നിന്ന് വിരമിച്ചിരുന്നു. ഇയാള്ക്കെതിരേ ഓഡിറ്റ് വിഭാഗം കെഎസ്ആര്ടിസി എംഡിക്ക് റിപ്പോര്ട്ട് നല്കി. കെഎസ്ആര്ടിസി അഡ്മിനിസ്ട്രേഷന് വിഭാഗത്തിന് കീഴിലുള്ള ഔട്ട് ഓഡിറ്റ് വിഭാഗമാണ് തട്ടിപ്പ് കണ്ടെത്തിയത്.
കോഴിക്കോട് കെഎസ്ആര്ടിസി ഡിപ്പോയിലെ ടിക്കറ്റ് ഇഷ്യൂവറായിരുന്ന ലോഹിതാക്ഷന് 2018, 19, 20 വര്ഷങ്ങളിലായി ലക്ഷക്കണക്കിന് രൂപയുടെ തട്ടിപ്പാണ് നടത്തിയെന്ന് ഓഡിറ്റ് വിഭാഗത്തിന്റെ റിപ്പോര്ട്ടില് പറയുന്നു. വിദ്യാര്ത്ഥികള്ക്ക് യാത്രാപാസ് അനുവദിക്കല്, പാസ് പുതുക്കല്, പാസ് പുതുക്കാന് വൈകിയവരില്നിന്നും പിഴ ഈടാക്കല് എന്നീ നടപടികളിലാണ് ക്രമക്കേട് നടത്തിയത്. ഈടാക്കിയ പണം രജിസ്റ്ററില് വരവ് വച്ചിട്ടില്ല. കൂടുതല് തുക ഈടാക്കുകയും ചെയ്തുവെന്ന് അന്വേഷണത്തില് വ്യക്തമായി. വിരമിക്കുന്നതിന് തൊട്ടുമുന്പ് ഇയാള് ബന്ധപ്പെട്ട രജിസ്റ്ററുകള് തീവച്ചു നശിപ്പിക്കുകയും ചെയ്തുവെന്ന് അന്വേഷണത്തില് കണ്ടെത്തി.
ഇടത് തൊഴിലാളി സംഘടനയായ കെഎസ്ആര്ടി എംപ്ലോയീസ് അസോസിയേഷന് യൂണിറ്റ് പ്രസിഡന്റായിരുന്നു ലോഹിതാക്ഷന്. ഇയാള് ലക്ഷങ്ങളുടെ തട്ടിപ്പാണ് നടന്നത്തിയതെന്നും എന്നാല് തുക എത്രയെന്ന് ഇപ്പോള് പറയാനാകില്ലെന്നും ഒഎഡി വിഭാഗം ഉദ്യോഗസ്ഥര് പറഞ്ഞു. അന്വേഷണത്തിന്റെ ഭാഗമായി ക്രമക്കേട് നടന്ന കാലയളവില് പാസ് വാങ്ങിയ വിദ്യാര്ത്ഥികളെ കണ്ടെത്തി അന്വേഷണം നടത്തുമെന്നും ഉദ്യോഗസ്ഥര് അറിയിച്ചു. കെഎസ്ആര്ടിസി എംഡിക്ക് സമര്പ്പിച്ച പ്രാഥമിക റിപ്പോര്ട്ടിന്മേല്, വൈകാതെ തന്നെ നടപടിയുണ്ടായേക്കുമെന്നാണ് സൂചന.
