ന്യൂദല്ഹി: പുനീതിന്റെ അപ്രതീക്ഷിത വിയോഗം വിധിയുടെ ക്രൂരമായ ഒരു വഴിത്തിരിവാണെന്ന് പ്രധാനമന്ത്രി നരേന്ദ്രമോദി ട്വീറ്റ് ചെയ്തു. പുനീത് രാജ്കുമാര് എന്ന പ്രഗല്ഭനും കഴിവ് ഏറെയുള്ള നടനെയാണ് നഷ്ടമായതെന്നും മരണത്തിന് കീഴടങ്ങാനുള്ള പ്രായമായിരുന്നില്ല അദ്ദേഹത്തിനെന്നും മോദി ട്വീറ്റ് ചെയ്തു. ഒരുപാട് ഉയരങ്ങള് ഇനിയും കീഴടക്കാന് ബാക്കിയാണ് പുനീതിന്റെ മടക്കം. വരും തലമുറകള് അദ്ദേഹത്തിന്റെ പ്രവര്ത്തനങ്ങളേയും അത്ഭുതകരമായ വ്യക്തിത്വത്തേയും സ്നേഹത്തോടെ സ്മരിക്കും. അദ്ദേഹത്തിന്റെ കുടുംബാംഗങ്ങളോടും ആരാധകരോടും അനുശോചനം രേഖപ്പെടുത്തുന്നതായി പ്രധാനമന്ത്രി ട്വീറ്റില് കുറിച്ചു.
ആരാധകരുടെ പ്രിയപ്പെട്ട അപ്പുവാണ് വിടപറഞ്ഞത്. ഒരു ഞെട്ടലോടെയല്ലാതെ ഈ സത്യം ഉള്ക്കൊള്ളാന് സാധിക്കില്ലെന്ന് കര്ണാടക മുഖ്യമന്ത്രി ബസവരാജ് ബൊമ്മൈ പ്രതികരിച്ചു. പുനീതിന്റെ വേര്പാട് കന്നട നാടിന് എന്നും ഹൃദയത്തിലേറ്റ നഷ്ടമായിരിക്കും. പുനീത് രാജ്കുമാറിന്റെ ആകസ്മിക മരണം രാജ്യത്തുടനീളം ഞെട്ടലുണ്ടാക്കിയിട്ടുണ്ട്.
അദ്ദേഹത്തിന്റെ കുടുംബത്തിനൊപ്പം ദുഖത്തില് പങ്കുചേരുന്നതായി മുഖ്യമന്ത്രി പറഞ്ഞു. ചെറുപ്പം മുതലേ അദ്ദേഹം വളരെയധികം നേട്ടങ്ങള് കൈവരിച്ചിരുന്നു. ക്രിയാത്മകമായ പരിപാടികളുടെ നട്ടെല്ലായി എന്നും നിലനിന്നിരുന്ന അദ്ദേഹം ഇപ്പോള് ഇല്ലെന്ന് വിശ്വസിക്കാന് പ്രയാസമാണെന്ന് മന്ത്രി അശ്വത്നാരായണന് പറഞ്ഞു. സംസ്ഥാനത്തിന് നികത്താനാകാത്ത നഷ്ടമാണിതെന്ന് ഗവര്ണര് താവര്ചന്ദ് ഗെലോട്ട് ട്വീറ്റ് ചെയ്തു.
സിനിമ, രാഷ്ട്രീയ രംഗത്തെ നിരവധി പ്രമുഖരാണ് പുനീതിന് അനുശോചനം രേഖപ്പെടുത്തിയത്. പ്രിയതാരങ്ങളായ മമ്മൂട്ടി, മോഹന്ലാല്, ദുല്ഖര് സല്മാന്, അഭിഷേക് ബച്ചന്, ധനുഷ്, അജയ് ദേവ്ഗണ്, ജൂനിയര് എന്ടിആര്, മഹേഷ് ബാബു, ചിരഞ്ജീവി, ലക്ഷ്മി മഞ്ചു, രാംചരണ്, അനില് കപൂര്, ആര് മാധവന്, പൃഥ്വിരാജ് സുകുമാരന്, ഹന്സിക, വിവേക് ഒബ്റോയി, തമന്ന ഭാട്ടിയ, പൂജ ഹെഗ്ഡെ, എസ്.എസ് രാജമൗലി, കേന്ദ്രമന്ത്രി നിര്മല സീതാരാമന്, ആരോഗ്യ മന്ത്രി ഡോ. കെ. സുധാകര്, ഉപരാഷ്ട്രപതി വെങ്കയ്യ നായിഡു, മുന് പ്രധാനമന്ത്രി എച്ച്ഡി ദേവേഗൗഡ, കേരള മുഖ്യമന്ത്രി പിണറായി വിജയന്, തമിഴ്നാട് മുഖ്യമന്ത്രി എം.കെ. സ്റ്റാലിന് തുടങ്ങി നിരവധി പ്രമുഖര് അനുശോചനം രേഖപ്പെടുത്തി. ക്രിക്കറ്റ് താരങ്ങളായ അനില് കുംബ്ലെ, ഹര്ഭജന് സിംഗ്, വീരേന്ദര് സെവാഗ്, വെങ്കിടേഷ് പ്രസാദ്, തെലുങ്ക് സിനിമാ താരങ്ങളായ ചിരഞ്ജീവി, ബാലകൃഷ്ണ, പവന് കല്യാണ് എന്നിവരും അനുശോചനം രേഖപ്പെടുത്തി.
