തിരുവനന്തപുരം: പേരൂര്ക്കടയില് ചോരക്കുഞ്ഞിനെ തട്ടിയെടുത്ത സംഭവം മനസ്സാക്ഷിയെ ഞെട്ടിക്കുന്നതാണെന്നും ശിശുക്ഷേമ സമിതി സിപിഎം ക്ഷേമസമിതിയായി മാറിയെന്നും യുവമോര്ച്ച സംസ്ഥാന അധ്യക്ഷന് സി.ആര്. പ്രഫുല് കൃഷ്ണന് ആരോപിച്ചു. സിപിഎം നേതാക്കളുടെ ഒത്താശയോടെ നടന്ന സംഭവം പ്രബുദ്ധ കേരളത്തിന് അപമാനമാണ്.
ശിശുക്ഷേമ സമിതിയുടെ ഭാഗത്ത് നിന്ന് ഗുരുതരമായ കൃത്യവിലോപമാണ് ഉണ്ടായത്. ശിശുക്ഷേമ സമിതി അധികൃതര് സിപിഎമ്മിന് വിടുപണി ചെയ്യുകയാണ്. കുറ്റക്കാര്ക്കെതിരെ മുഖം നോക്കാതെ നടപടി സ്വീകരിക്കണം. കുട്ടിയെ അമ്മയ്ക്ക് തിരികെ ലഭിക്കാനുള്ള അടിയന്തര നടപടികള് സ്വീകരിക്കണം.
ദുരഭിമാനത്തിന്റെ പേരില് നടന്ന സംഭവം നടന്ന് ആറു മാസം കഴിഞ്ഞിട്ടും കേസു പോലും ഒതുക്കിത്തീര്ക്കാനാണ് പോലീസ് ശ്രമിച്ചത്. കേസ് അട്ടിമറിക്കാന് ഇടപെടലുകള് നടത്തിയ സിപിഎം നേതാക്കള്ക്കെതിരെയും നടപടികള് സ്വീകരിക്കണമെന്നും അദ്ദേഹം ആവശ്യപ്പെട്ടു.
