ശ്രീകാര്യം: ഒരാഴ്ചയ്ക്കകം രണ്ടുതവണ ബിജെപി നേതാവിന്റെ കാര് കത്തിച്ച പ്രതി പിടിയില്. പാങ്ങപ്പാറ സ്വദേശിയായ അമല് (20) ആണ് ശ്രീകാര്യം പോലീസിന്റെ പിടിയിലായത്. മൂന്നുദിവസം മുമ്പ് കത്തിച്ച കാര് വീണ്ടും ശനിയാഴ്ച രാത്രി കത്തിച്ച വിവരമറിഞ്ഞ് പോലീസ് സ്ഥലത്തെത്തി സിസിടിവി ക്യാമറദൃശ്യങ്ങള് പരിശോധിച്ചാണ് പ്രതിയെ പിടികൂടിയത്.
പ്രതിയെ തിരയുന്നതിനിടയില് സമീപത്തെ വീടിനു മുന്നില് പാര്ക്കുചെയ്തിരുന്ന ബൈക്കിനും തീയിട്ടു. ബിജെപി കഴക്കൂട്ടം മണ്ഡലം ജനറല്സെക്രട്ടറിയും പത്രഏജന്റുമായ കുറ്റിച്ചല് സ്വദേശി സുനിലിന്റെ (ചോട്ടു) വീടിനുസമീപം പാര്ക്ക് ചെയ്തിരുന്ന കാറാണ് കത്തിച്ചത്. വിവരമറിഞ്ഞ് സ്ഥലത്തെത്തിയ പോലീസ് സിസിടിവി ക്യാമറ ദൃശ്യങ്ങള് പരിശോധിക്കുന്നതിനിടെ സുനിലിന്റെ വീടിനു സമീപം താമസിക്കുന്ന ടെക്നോപാര്ക്ക് ജീവനക്കാരന് ജോമേഴ്സിന്റെ വീടിനു മുന്നില് പാര്ക്ക് ചെയ്ത ബൈക്കില് നിന്നും തീയും പുകയും ഉയരുന്നതു കണ്ടു.
തുടര്ന്ന് പോലീസും നാട്ടുകാരും നടത്തിയ പരിശോധനയില് സമീപത്തുള്ള വീട്ടില് താമസിക്കുന്ന അമലിനെ കസ്റ്റഡിയില് എടുത്തു. ചെരുപ്പില് തീ പിടിപ്പിച്ചാണ് ഇയാള് വാഹനങ്ങള് കത്തിച്ചതെന്ന് പോലീസ് പറഞ്ഞു. വിവരങ്ങള്ക്കായി അമലിനെ ചോദ്യം ചെയ്തുവരുന്നു.
