കോഴിക്കോട്: പ്രപഞ്ചശക്തിക്ക് സ്ത്രെണ ഭാവം കല്പ്പിച്ചതിലൂടെ ഭാരത ഋഷികള് സ്ത്രീയെ ലോകത്തിനു മുന്നില് ഔന്നത്യത്തിലെത്തിച്ചതായി ആധ്യാത്മിക പ്രഭാഷക ഡോ.ലക്ഷ്മി ശങ്കര്. ഭാരത്തിലെ സാധനാ പദ്ധതികള് ലോക നേതൃത്വത്തിലേക്ക് സ്ത്രീയെ ഉയര്ത്താന് പര്യാപ്തമെന്നും അവര് പറഞ്ഞു. കേസരി ഭവനില് നവരാത്രി സര്ഗോത്സവത്തോടനുബന്ധിച്ചുള്ള സര്ഗസംവാദത്തില് ജാഗരണത്തിന്റെ സ്ത്രൈണസാധ്യതകള് ഭാരതീയ സംസ്കൃതിയില് എന്ന വിഷയത്തില് സംസാരിക്കുകയായിരുന്നു.
ശക്തി ഉപാസനയുടെ നവരാത്രി ആഘോഷം സ്വയം ജാഗ്രതയുടെ ഒന്പത് ഭാവങ്ങള് ഒന്പത് ദിവസകളിലായി ആവാഹിക്കുകയാണ്. ഓരോ ദിവസത്തിലെ ഭാവങ്ങളും സാധകരെ ആത്മീയമായി സ്വയം ഉണരാന് പ്രേരിപ്പിക്കുന്നു. പ്രപഞ്ചത്തെ സ്ത്രൈണ ഭാവത്തിലാണ് ഋഷിമാര് കാട്ടിത്തന്നത്. സ്ത്രൈണത ഉണര്വ്വാണ്. നവരാത്രിയുടെ ആദ്യ മൂന്നു ദിവസം സ്ത്രൈണതയോടൊപ്പം ഇച്ഛാശക്തിയുടെ ഭാവവും പ്രകടമാക്കുന്നു. ദേവീ ഉപാസനയിലൂടെ കുടുംബത്തെ ധീരമായി നിലനിര്ത്താന് സ്ത്രീകള്ക്ക് കഴിയുന്നു. ഉള്ളില് നിറഞ്ഞ ആത്മവീര്യവുമായി ലോകത്തെ ഉണര്ത്തുന്ന ശക്തി സംഭരിക്കാന് നവരാത്രി ആഘോഷങ്ങള്ക്ക് സാധിക്കുന്നു. മഹിഷാസുരന്മാര് നിറഞ്ഞ ഇക്കാലത്ത്, മഹിഷന്റെ തലയറുത്തത് ദേവിയുടെ സന്ദേശം സര്വ്വകാല പ്രസക്തം. ആസുരികതയുടെ കൈയ്യിലകപ്പെടന്ന അറിവ് രാജ്യത്തെ പിന്നോട്ടടിപ്പിക്കുമെന്നും അവര് പറഞ്ഞു.
ഭുവനേശ്വരി രാജേന്ദ്രന് അധ്യക്ഷത വഹിച്ച ചടങ്ങില് ഡോ.ശ്രീശൈലം ഉണ്ണികൃഷ്ണന് രചിച്ച വിടരുന്ന വാക്കുകള് എന്ന പുസ്തകം ഡോ.കെ.എം. പ്രിയദര്ശന് ലാല് ഡോ. ലക്ഷ്മി ശങ്കറിന് നല്കി പ്രകാശനം ചെയ്തു. യുവശ്രീയും സംഘവും അവതരിപ്പിച്ച തളി ടാഗോര് ബാലഗോകുലത്തിന്റെ ഭജനയും മനുരാജ് തിരുവനന്തപുരം അവതരിപ്പിച്ച ഗസല് സന്ധ്യയും അരങ്ങേറി. ശ്രീജ സി നായര്, ശുഭ പി.സി എന്നിവര് സംസാരിച്ചു.
