കോഴിക്കോട് : പ്രമുഖ ബിസിനസ്സ് ഗ്രൂപ്പുകളിലൊന്നായ കല്യാണ് സില്ക്സിന്റെ നിര്മാണത്തിലിരുന്ന കെട്ടിടം തകര്ന്ന് അപകടം. കോഴിക്കോട് പൊറ്റമ്മലിലെ നിര്മാണത്തിലിരുന്ന കെട്ടിടത്തിന്റെ സ്ലാബ് തകര്ന്നുവീണ് ഒരാള് മരിച്ചു. നാല് പേര്ക്ക് പരിക്ക്.
തമിഴ്നാട് സ്വദേശി കാര്ത്തിക്കാണ് (22)മരിച്ചത്. പരിക്കേറ്റവരും തമിഴ്നാട് സ്വദേശികളാണ്. തകര്ന്ന് വീണ സ്ലാബിന് അടിയില് കാര്ത്തിക് കുടുങ്ങി കിടക്കുന്ന നിലയിലായിരുന്നു. പരിക്കേറ്റ നാല് പേരില് ഒരാളുടെ നില അതീവ ഗുരുതരമാണ്. സ്ഥലത്ത് പോലീസ് എത്തി നടപടികള് ആരംഭിച്ചിട്ടുണ്ട്.
കോഴിക്കോട് സിറ്റി ഡിസിപി സ്വപ്നില് മഹാജന് അപകടം നടന്ന സ്ഥലം സന്ദര്ശിച്ചു. സംഭവത്തില് കേസെടുത്തെന്ന് അദ്ദേഹം അറിയിച്ചു. അപകട സമയത്ത് മരിച്ച കാര്ത്തിക്കടക്കം അഞ്ച് പേരാണ് ഇവിടെയുണ്ടായിരുന്നത്. അപകടമുണ്ടാകാന് ഇടയായ കാരണത്തെ കുറിച്ച് പരിശോധിക്കുമെന്നും ഡിസിപി സ്വപ്നില് മഹാജന് പറഞ്ഞു.
