തിരുവനന്തപുരം: സംസ്ഥാനത്ത് സിനിമാ തിയേറ്ററുകള്‍ തുറക്കാന്‍ അനുകൂല സാഹചര്യമെന്ന് മന്ത്രി സജി ചെറിയാന്‍. തിയേറ്ററുകള്‍ തുറക്കുന്നത് സര്‍ക്കാരിന്റെ ആലോചനയിലുണ്ട്. സംസ്ഥാനത്ത് ടിപിആര്‍ കുറഞ്ഞുവരികയാണ് വാക്‌സിനേഷനും 90 ശതമാനത്തോളം ജനങ്ങളിലെത്തി കഴിഞ്ഞു. ഈ സാഹചര്യങ്ങള്‍ കണക്കിലെടുത്തുകൊണ്ടാണ് തിയേറ്ററുകളും ഓഡിറ്റോറിയങ്ങളും തുറക്കുന്നത് പരിഗണിക്കുന്നതെന്ന് മന്ത്രി വ്യക്തമാക്കി.
എന്നാല്‍ ആരോഗ്യ വിദഗ്‌ദ്ധരുമായി കൂടിയാലോചിച്ച ശേഷമേ അന്തിമ തീരുമാനം കൈക്കൊള്ളൂവെന്ന് സജി ചെറിയാന്‍ പറഞ്ഞു. സീരിയല്‍, സിനിമാ ചിത്രീകരണത്തിന് നിലവില്‍ അനുമതിയുണ്ട്. മാത്രവുമല്ല കോളേജുകളും സ്‌കൂളുകളും തുറക്കാന്‍ ഒരുങ്ങുകയാണ്. അതുകൊണ്ടു തന്നെ തിയേറ്ററുകള്‍ തുറക്കുന്നതും ആലോചിക്കാമെന്നാണ് സര്‍ക്കാറിന്റെ നിലപാട്.
നിലവില്‍ കടുത്ത സാമ്പത്തിക പ്രതിസന്ധിയാണ് തിയേറ്റര്‍ ഉടമകള്‍ അനുവഭിക്കുന്നത്. മാസങ്ങള്‍ക്ക് മുമ്പ് ഷൂട്ടിംഗ് പൂര്‍ത്തിയാക്കി പ്രദര്‍ശനത്തിന് തയ്യാറായിട്ടുള്ള വമ്പന്‍ സിനിമകള്‍ നിര്‍മ്മാതാക്കള്‍ക്ക് ഇനിയും ഹോള്‍ഡ് ചെയ്യാന്‍ കഴിയാത്ത സ്ഥിതിയാണ്.
