വടക്കഞ്ചേരി: ശ്രീദേവിയെ ചേര്‍ത്തുപിടിച്ച് സുരേഷ്ഗോപി ആശ്വസിപ്പിച്ചു. ഒപ്പമുണ്ടെന്ന് കരുത്ത് പകര്‍ന്നു. നാടോടിസ്ത്രീയുടെ തണലില്‍ നിന്ന് അനാഥാലയത്തിലേക്കും പിന്നീട് ജിവിതത്തിലേക്കും കടന്ന കാവശ്ശേരി മുല്ലക്കല്‍ തെലുങ്കന്‍ പാളയത്തെ സതീഷിന്റെ ഭാര്യ ശ്രീദേവിയെ കാണാന്‍ ഇന്നലെയാണ് സുരേഷ്ഗോപി എത്തിയത്. ശ്രീദേവിയുടെ ജീവിതകഥ സിനിമാക്കഥയെ പോലും വെല്ലുന്നതാണെന്ന് അദ്ദേഹം പറഞ്ഞു.
ജനിച്ച ഉടനെ തന്നെ തെരുവില്‍ വലിച്ചെറിയപ്പെട്ട ചോരക്കുഞ്ഞിനെയാണ് മലപ്പുറം കോട്ടയ്‌ക്കല്‍ കോഴിച്ചെന പുറമ്പോക്കില്‍ കുടില്‍ കെട്ടി താമസിച്ചിരുന്ന തങ്കമ്മ എന്ന നാടോടി സ്ത്രീ എടുത്തുവളര്‍ത്തിയത്. മൂന്നു വയസ്സിനു ശേഷം ആലുവ ശിശുഭവനിലായിരുന്നു ശ്രീദേവി. അഞ്ചാം വയസ്സിലാണ് സുരേഷ്ഗോപിയെ ആദ്യമായി കാണുന്നത്. ഇപ്പോള്‍ സതീഷിന്റെ ഭാര്യയായി നാലു വയസ്സുകാരി ശിവാനിയുടെ അമ്മയായി കാവശ്ശേരിയില്‍ വാടകയ്‌ക്കെടുത്ത ഒറ്റമുറി ഫാന്‍സികടയുടെ ഉള്ളില്‍ താമസം.
സുരേഷ്ഗോപിയെ കാണണമെന്ന് ശ്രീദേവി ബിജെപി സംസ്ഥാന സമിതി അംഗം സി.എസ്.ദാസിനെ അറിയിക്കുകയായിരുന്നു. ഇതറിഞ്ഞ സുരേഷ്ഗോപി ഇന്നലെ ഉച്ചയോടെ ശ്രീദേവിയുടെ വീട്ടിലെത്തി. ബിജെപി ജില്ലാ അധ്യക്ഷന്‍ അഡ്വ. ഇ കൃഷ്ണദാസ്, ജനറല്‍ സെക്രട്ടറിമാരായ പി. വേണുഗോപാലന്‍ , കെ.എം. ഹരിദാസ്, സംസ്ഥാന സെക്രട്ടറി എ. നാഗേഷ്, സംസ്ഥാന സമിതി അംഗം സി.എസ് ദാസ് എന്നിവരും അദ്ദേഹത്തോടൊപ്പമുണ്ടായിരുന്നു.
