കൊല്ക്കത്ത: ഡ്യൂറന്ഡ് കപ്പ് ഫുട്ബോളില് ക്വാര്ട്ടര് ബെര്ത്ത് ലക്ഷ്യമിട്ട് കേരള ബ്ലാസ്റ്റേഴ്സ് എഫ്സി ഇറങ്ങുന്നു. ഗ്രൂപ്പ് സിയിലെ രണ്ടാം മത്സരത്തില് അവര് നാളെ ഇന്ത്യന് ക്യാപ്റ്റന് സുനില് ഛേത്രി നയിക്കുന്ന കരുത്തരായ ബെംഗളൂരു എഫ്സിയെ നേരിടും. വൈകിട്ട് മൂന്നിനാണ് കിക്കോഫ്. ബെംഗളൂരു എഫ്സിയുടെ ആദ്യ മത്സരമാണിത്.
ബെംഗളൂരു എഫ്സിയെ തോല്പ്പിച്ചാല് ബ്ലാസ്റ്റേഴ്സിന് ക്വാര്ട്ടര് ഉറപ്പിക്കാം. ആദ്യ മത്സരത്തില് ഇന്ത്യന് നേവിയെ പരാജയപ്പെടുത്തിയ ബ്ലാസ്റ്റേഴ്സ് മൂന്ന് പോയിന്റുമായി ഗ്രൂപ്പില് സി യില് ഒന്നാം സ്ഥാനത്താണ്. രണ്ട് മത്സരങ്ങളില് മൂന്ന് പോയിന്റുള്ള ഇന്ത്യന് നേവിയാണ് രണ്ടാം സ്ഥാനത്ത്. കളിച്ച രണ്ട് മത്സരങ്ങളും തോറ്റ ദല്ഹി എഫ്സി പൂജ്യം പോയിന്റുമായി ഏറ്റവും പിന്നിലാണ്.
