കൊച്ചി: എറണാകുളം നോർത്ത് റെയിൽവേ സ്റ്റേഷന് മുന്നിലെ ഇരുനില കെട്ടിടം ചെരിഞ്ഞു. കടകളും ഓഫീസുകളുമടക്കം പ്രവർത്തിക്കുന്ന പതിറ്റാണ്ടുകൾ പഴക്കമുള്ള രണ്ട് നില കെട്ടിടമാണ് ചെരിഞ്ഞത്. കെട്ടിടത്തിന്റെ ഭിത്തികളും തകർന്നിരിക്കുകയാണ്.
ഉള്ളിലുണ്ടായിരുന്ന ആളുകളെ ഒഴിപ്പിച്ചു. ആർക്കും പരിക്കുകളില്ല. രാവിലെയാണ് സംഭവമെന്നതിനാൽ കൂടുതൽ ജോലിക്കാർ ഉണ്ടായിരുന്നില്ല. ഫയർഫോഴ്സ് സംഘവും ജില്ല ദുരന്ത നിവാരണ അതോറിറ്റി ഉദ്യോഗസ്ഥരും സ്ഥലത്തെത്തിയിട്ടുണ്ട്. മുകളിലത്തെ നില കഴിഞ്ഞ അഞ്ചുവർഷമായി അടച്ചിട്ടിരിക്കുകയായിരുന്നു.
കെട്ടിടത്തിന് 60 വർഷത്തിലധികം പഴക്കമുണ്ടെന്നും പുതിയ ഷോപ്പിംഗ് കോംപ്ലക്സ് പണിയണമെന്ന ഉദ്ദേശത്തിലാണ് കെട്ടിടം പൊളിച്ച് നീക്കാതിരുന്നതെന്ന് കെട്ടിടം ഉടമ നൂറുദ്ദീൻ മേത്തർ പറഞ്ഞു. കാലപ്പഴക്കമാണ് കാരണമാണ് കെട്ടിടം ചെരിഞ്ഞതെന്ന് ടി ജെ വിനോദ് എംഎൽഎ പറഞ്ഞു. ചെരിഞ്ഞ കെട്ടിടം പൊളിച്ച് മാറ്റിയില്ലെങ്കിൽ സമീപത്തെ കെട്ടിടങ്ങൾക്കും ഭീഷണിയാണെന്നും എംഎൽഎ കൂട്ടിച്ചേർത്തു.
