ബെംഗളൂരു: കര്ണാടകത്തിലെ ചിക്കബല്ലാപുര ജില്ലയില് രാവിലെ കനത്ത മണ്ണിടിച്ചില്. പ്രധാന വിനോദ സഞ്ചാരകേന്ദ്രമായ നന്ദി ഹില്സിലുണ്ടായ മണ്ണിടിച്ചിലില് ആളപായം റിപ്പോര്ട്ട് ചെയ്തിട്ടില്ല. അപകടത്തെ തുടര്ന്നുണ്ടായ നാശനഷ്ടങ്ങളെക്കുറിച്ച് ഇനിയും വ്യക്തത വരാനുണ്ട്. മണ്ണിടിച്ചില് കാരണം നന്ദിയിലേക്ക് എത്തിയ യാത്രക്കാരെ തിരിച്ചയച്ചു. മണ്ണിടിച്ചിലിനെ തുടര്ന്ന് ബെംഗളൂരു നഗരത്തിലേക്കുള്ള റോഡുകളില് ഗതാഗതത്തിന് തടസം നേരിട്ടു. രംഗപ്പ സര്ക്കിളില്വച്ച് നന്ദിയിലേക്ക് പോകുന്ന എല്ലാ വാഹനങ്ങളും അധികൃതര് ഇടപെട്ട് തടഞ്ഞു.
നന്ദി ഹില്സിലേക്ക് പോകുന്ന വിനോദസഞ്ചാരികളോട് മടങ്ങാന് ചിക്കബല്ലാപുര ജില്ലാ പോലീസ് ആവശ്യപ്പെട്ടു. കനത്ത മഴയെ തുടര്ന്ന് നന്ദി ഹില്സില് വൈദ്യുതി വിതരണവും തടസ്സപ്പെട്ടിട്ടുണ്ട്. മണ്ണിടിച്ചിലുണ്ടായ സംഭവങ്ങള് മുമ്പ് റിപ്പോര്ട്ട് ചെയ്യപ്പെട്ടിട്ടുണ്ടെന്നും എന്നാല് ആദ്യമായാണ് മണ്ണിടിച്ചിലിന് സാക്ഷിയാകുന്നതെന്നും നന്ദി ഹില്സ് സ്പെഷ്യല് ഓഫീസര് പറഞ്ഞു.
നന്ദി ക്രോസ് റോഡിലെ, റോഡിന്റെ ഒരു ഭാഗം മണ്ണിടിച്ചിലില് തകര്ന്നതായി അധികൃതര് അറിയിച്ചു. അവശിഷ്ടങ്ങള് നീക്കം ചെയ്യുന്നതിനായി ദുരന്തനിവാരണ സേനയുടെ പത്ത് സംഘങ്ങള് സംഭവ സ്ഥലത്തെത്തി.
