മൂന്നാര്‍: മാങ്കുളം ആനക്കുളത്ത് ഭാര്യയെ കൊലപ്പെടുത്തിയ ശേഷം ഭര്‍ത്താവിനെ തൂങ്ങിമരിച്ച നിലയില്‍ കണ്ടെത്തി. നെടുമ്പാലപുഴയില്‍ ജോസഫ് മാത്യു(ജോസ്-55), ഭാര്യ സെലിന്‍(50) എന്നിവരെയാണ് ഇന്നലെ ഉച്ചയോടെ മരിച്ച നിലയില്‍ കണ്ടത്. അതേ സമയം സംഭവത്തിന് പിന്നിലെ കാരണം വ്യക്തമായിട്ടില്ല. എന്നാല്‍ ജോസ് മാനസിക ബുദ്ധിമുട്ടികള്‍ പ്രകടിപ്പിച്ചിരുന്നതായി നാട്ടുകാരില്‍ നിന്ന് വിവരം ലഭിച്ചതായി പോലീസ് വ്യക്തമാക്കി.
മലഞ്ചരക്ക് കച്ചവടക്കാരന്‍ ആണ് ജോസ്. ആനക്കുളത്തെ ഇയാളുടെ വീട് ചൊവ്വാഴ്ച ഉച്ചവരെ പൂട്ടിയിട്ട നിലയില്‍ ആയിരുന്നു. ഭാര്യ സെലിന്റെ സുഹൃത്തുക്കളായ സമീപവാസികള്‍ വീട്ടില്‍ എത്തിയപ്പോഴാണ് സംഭവം പുറത്ത് അറിഞ്ഞത്. തുടര്‍ന്ന് മാങ്കുളം പോലീസ് ഔട്ട് പോസ്റ്റില്‍ വിവരം അറിയിച്ചു. സിവില്‍ പോലീസ് ഓഫീസര്‍ ബിന്‍സില്‍ സ്ഥലത്ത് എത്തി വീട് തുറന്ന് പരിശോധിച്ചു. ജോസിനെ വീടിനകത്ത് മുന്നിലെ മുറിയില്‍ തൂങ്ങിയ നിലയില്‍ ആണ് കണ്ടത്.
ഭാര്യയെ കിടപ്പ് മുറിയില്‍ കട്ടിലില്‍ മരിച്ച നിലയിലും. തലയ്ക്കടിയേറ്റ് ആണ് മരണമെന്നാണ് പ്രാഥമിക നിഗമനം. സെലിന്റെ മൃതദേഹത്തിന് ഒരു ദിവസത്തെ പഴക്കമുണ്ടെന്ന് കരുതുന്നു. മൂന്നാര്‍ സിഐ മനേഷ് പൗലോസും സംഘവും വൈകിട്ടോടെ സംഭവ സ്ഥലത്ത് എത്തി. പോസ്റ്റുമോര്‍ട്ടം നടത്തി വിശദമായ അന്വേഷണം നടത്തിയാലെ മരണ കാരണം വ്യക്തമാകൂ എന്ന് പോലീസ് പറഞ്ഞു.
അതേ സമയംജോസിന്റെ മാനസിക പ്രശ്‌നത്തെ തുടര്‍ന്നുണ്ടായതാണ് കൊലപാതകവും പിന്നീടുള്ള ആത്മഹത്യവുമെന്നാണ് പോലീസിന്റെ പ്രാഥമിക വിലയിരുത്തല്‍. ഫോറന്‍സിക് വിദഗ്ധര്‍ സ്ഥലത്തെത്തിയ ശേഷം മൃതദേഹം ഇന്ന് പോസ്റ്റുമോര്‍ട്ടത്തിനായി മാറ്റും. മരിച്ച ജോസ് മാത്യുവിനും സെലിനും ഒരു മകള്‍ ആണുള്ളത്.
പ്രതികരിക്കാൻ ഇവിടെ എഴുതുക: