ഓടിക്കൊണ്ടിരുന്ന ഓട്ടോറിക്ഷയിൽ വൈദ്യുതി പോസ്റ്റ് ഒടിഞ്ഞ് വീണു; ഡ്രൈവർക്ക് ഗുരുതര പരുക്ക്

നെടുങ്കണ്ടം: ഓടിക്കൊണ്ടിരുന്ന ഓട്ടോറിക്ഷയിൽ വൈദ്യുതി പോസ്റ്റ് ഒടിഞ്ഞ് വീണ് ഓട്ടോറിക്ഷ ഡ്രൈവർക്ക് ഗുരുതര പരുക്കേറ്റു. സുബുകണ്ടംപാറ മദൻ കുമാർ (32) തലക്കാണ് ഗുരുതരമായി പരുക്കേറ്റത്. മദൻ കുമാറിനെ നെടുങ്കണ്ടത്തെ സ്വകാര്യ ആശുപത്രിയിൽ പ്രവേശിപ്പിച്ച ശേഷം തേനി മെഡിക്കൽ കോളജിലേക്ക് മാറ്റി. 

നെടുങ്കണ്ടം കരടി വളവിനു സമീപം വ്യാഴാഴ്‌ച്ച രാവിലെയാണ് അപകടം നടന്നത്. കനത്ത കാറ്റിലും മഴയിലും സംസ്ഥാന പാതയുടെ സമീപത്ത് നിന്ന മരം ഒടിഞ്ഞ് വൈദ്യുതി ലൈനിലേക്ക് പതിച്ചു. മരം വീണ ആഘാതത്തിൽ വൈദ്യുത പോസ്റ്റ് ഒടിഞ്ഞ് ഓടിക്കൊണ്ടിരുന്ന ഓട്ടോറിക്ഷയുടെ മുകളിലേക്ക് വീഴുകയായിരുന്നു. ഡ്രൈവറിരിക്കുന്ന ഭാഗത്താണ് പോസ്റ്റ് പതിച്ചത്. ഇതേ ഓട്ടോറിക്ഷയുടെ പിന്നിലിരുന്ന് യാത്ര ചെയ്ത യാത്രക്കാരൻ അദ്ഭുതകരമായി രക്ഷപെട്ടു. ഈ യാത്രക്കാരനാണ് മറ്റൊരു വാഹനത്തിൽ മദൻകുമാറിനെ നെടുങ്കണ്ടത്തെ സ്വകാര്യ ആശുപത്രിയിൽ എത്തിച്ചത്. 

രാവിലെ കോവിഡ് വാക്സിൻ എടുക്കാനായി സുബുകണ്ടം പാറ സ്വദേശി മദൻകുമാറിനെ ഓട്ടം വിളിക്കുകയായിരുന്നു.