ന്യൂദല്ഹി : അന്തരിച്ച മുന് കേന്ദ്രമന്ത്രിയും ബിജെപി നേതാവുമായ രംഗരാജന് കുമാരമംഗലത്തിന്റെ ഭാര്യ കിറ്റി കുമാരമംഗലത്തെ കൊല്ലപ്പെട്ട നിലയില് കണ്ടെത്തി. 67 വയസ്സായിരുന്നു. ദല്ഹിയിലെ വീടിനുള്ളില് ചൊവ്വാഴ്ച രാത്രിയിലാണ് കൊല്ലപ്പെട്ട നിലയില് കണ്ടെത്തിയത്. മോഷണ ശ്രമത്തിനിടെ കൊല്ലപ്പെട്ടതാണെന്നാണ പ്രാഥമിക നിഗമനം.
ചൊവ്വാഴ്ച രാത്രി ഒമ്പതു മണിയോടെ കൊലപാതകികള് വീടിനകത്ത് കയറിയതെന്ന് പോലീസ് പറഞ്ഞു. സ്ഥിരമായി എത്താറുള്ള അലക്കുകാരനാണ് ആദ്യം വീട്ടിലെത്തിയത്. ഇയാള് കോളിങ് ബെല്ലടിച്ചപ്പോള് വീട്ടുജോലിക്കാരി വാതില് തുറന്നു. വീട്ടുജോലിക്കാരിയെ ഇയാള് കെട്ടിയിട്ടു. തുടര്ന്നാണ് സംഘത്തിലെ മറ്റ് രണ്ടുപേര് വീട്ടില് കയറിയത്. ഇവര് കിറ്റിയെ തലയിണ ഉപയോഗിച്ച് ശ്വാസം മുട്ടിച്ച് കൊലപ്പെടുത്തുകയായിരുന്നു. മൂന്ന് പേരും തിരിച്ചുപോയ ശേഷം വീട്ടുജോലിക്കാരി എങ്ങനെയോ തന്റെ കെട്ടഴിക്കുകയും പോലീസിനെ വിവരമറിയിക്കുകയുമായിരുന്നു. പതിനൊന്ന് മണിയോടെയാണ് വിവരം അറിഞ്ഞതെന്ന് പോലീസ് പറഞ്ഞു.
സംഭവത്തില് ഒരാളെ കസ്റ്റഡിയില് എടുത്തിട്ടുണ്ട്. രണ്ട് പേര്ക്കായി തെരച്ചില് തുടരുന്നു. വസന്തവിഹാര് സ്വദേശിയായ അലക്കുകാരന് രാജുവിനെയാണ് കസ്റ്റഡിയിലെടുത്തിട്ടുള്ളത്. ഇയാള് കൂടെയുണ്ടായിരുന്ന രണ്ട് പേരെ കുറിച്ച് വിവരം നല്കിയിട്ടുണ്ട്. രാജുവിനെ ജോലിക്കാരി തിരിച്ചറിഞ്ഞിട്ടുമുണ്ട്. തങ്ങളെത്തുമ്പോള് വീട്ടിനകത്ത് ബ്രീഫ് കേസുകളും മറ്റും തുറന്ന നിലയിലായിരുന്നെന്നും പോലീസ് പറഞ്ഞു.
സുപ്രീം കോടതിയില് അഭിഭാഷകയായിരുന്നു കിറ്റി. കോണ്ഗ്രസ് നേതാവായിരുന്ന പി.ആര് കുമാരമംഗലം പിന്നീട് ബിജെപിയില് ചേര്ന്നിരുന്നു. പി.വി. നരസിംഹറാവു സര്ക്കാറില് അംഗമായിരുന്നു ഇദ്ദേഹം. പിന്നീട് വാജ്പേയി സര്ക്കാറില് ഊര്ജ്ജ വകുപ്പ് കൈകാര്യം ചെയ്തു.
