കൊച്ചി: ബ്രണ്ണന് കോളേജ് പഠനകാലത്തെ കാര്യം അഭിമുഖത്തില് ഉള്പ്പെടുത്തില്ലെന്ന ഉറപ്പിന് മുകളിലാണ് താന് ഇക്കാര്യം വെളിപ്പെടുത്തിയത്. വാരികയിലെ ലേഖകന് ചതിച്ചതാണെന്നും കെപിസിസി പ്രസിഡന്റ് കെ. സുധാകരന്. മക്കളെ തട്ടിക്കൊണ്ടുപോകാന് താന് പദ്ധതിയിട്ടെന്ന പിണറായി വിജയന്റെ ആരോപണത്തേയും സുധാകരന് നിഷേധിച്ചു. കഴിഞ്ഞ ദിവസം പത്രസമ്മേളനത്തിനിടെ മുഖ്യമന്ത്രി പിണറായി വിജയന് തനിക്കെതിരെ ഉന്നയിച്ച ഗുരതരമായ ആരോപണങ്ങളും വിമര്ശനങ്ങളോടും എറണാകുളം ഡിസിസി ഓഫീസില് വെച്ച് മറുപടി പറയുകയായിരുന്നു അദ്ദേഹം.
ബ്രണ്ണന് കോളേജില് വെച്ച് താന് പിണറായി വിജയനെ ചവിട്ടിയിട്ടു എന്നത് പറയാത്ത കാര്യമാണ്. തെറ്റായി വ്യാഖ്യാനിച്ചതാണ്. ലേഖകന് പറഞ്ഞതു കൊണ്ടാണ് സ്വകാര്യമായി കുറച്ച് കാര്യങ്ങള് പറഞ്ഞത്. സംഭവത്തിന്റെ വിശദീകരണം പേഴ്സണലായി നല്കിയിട്ടുണ്ട്. ചതിയുടെ ശൈലിയില് ഇക്കാര്യങ്ങള് അഭിമുഖത്തില് ചേര്ത്തതിന്റെ കുറ്റം എനിക്കല്ല. അത് മാധ്യമപ്രവര്ത്തനത്തിന് അപമാനമാണ്. പിണറായി വിജയനെ ചവിട്ടി താന് വലിയ അഭ്യാസിയാണെന്ന് കേരളത്തെ അറിയിക്കാനുള്ള താത്പര്യം എനിക്കില്ല അദ്ദേഹം പറഞ്ഞു.
പിആര് ഏജന്സിയുടെ കൂട്ടില് നിന്ന് പുറത്തുവന്ന യഥാര്ത്ഥ പിണറായി വിജയനെയാണ് കഴിഞ്ഞദിവസം കണ്ടത്. അദ്ദേഹത്തിന്റെ ഭാഷ പൊളിറ്റിക്കല് ക്രിമിനലിന്റേതാണ്. മുഖ്യമന്ത്രി ഉന്നയിച്ച ആരോപങ്ങളോട് അതുപോലെ തന്നെ മറുപടി പറയാന് കഴിയില്ല. അഭിമുഖത്തില് വന്നതെല്ലാം ഞാന് പറഞ്ഞ കാര്യമല്ല. കുട്ടികളെ തട്ടികൊണ്ടുപോകാന് ഞാന് പദ്ധതിയിട്ടെന്ന് മുഖ്യമന്ത്രിയെ അറിയിച്ച വ്യക്തിയുടെ പേര് എന്തുകൊണ്ടാണ് വെളിപ്പെടുത്താത്തത്. എന്തുകൊണ്ട് മുഖ്യമന്ത്രി അന്ന് പരാതി നല്കിയില്ല. ആരോടും പറഞ്ഞില്ലെന്നാണ് പിണറായി പറഞ്ഞത്. സ്വന്തം ഭാര്യയോട് പോലും പറഞ്ഞിട്ടില്ല പോലും. സ്വന്തം മക്കളുടെ കാര്യം ഭാര്യയോട് പറയില്ലേ ആരോപണം വിശ്വാസയോഗ്യമല്ലെന്നും കെ. സുധാകരന് അറിയിച്ചു.
കള്ളക്കടത്ത് നടത്തിയത് മുഖ്യമന്ത്രിയുടെ ഓഫിസാണ്. മുഖ്യമന്ത്രിയുടെ ഓഫീസിനാണ് വിദേശ കറന്സി ഇടപാട് ഉള്ളത്. ഇനിക്കല്ല. സ്വപ്ന സുരേഷിനെ നാല് വര്ഷം കൊണ്ട് നടന്നത് പിണറായി വിജയനാണ്. എന്നിട്ട് ചോദിക്കുമ്പോള് ആരാ സ്വപ്ന എന്ന് തിരിച്ച് ചോദിക്കുന്നു. മണല് മാഫിയ ബന്ധം എനിക്ക് ഉണ്ടെങ്കില് അന്വേഷിക്കട്ടെ. അന്വേഷിക്കാന് മുഖ്യമന്ത്രിയുടെ കൈയ്യില് ഭരണമുണ്ടല്ലോ. ആരാണ് മാഫിയയെന്ന് ജസ്റ്റിസ് സുകുമാരന്റെ റിപ്പോര്ട്ടിലുണ്ട്. തോക്ക് കൊണ്ട് നടക്കുന്ന പിണറായി ആണോ ഇതുവരെ തോക്ക് ഇല്ലാത്ത ഞാന് ആണോ മാഫിയ എന്ന് ജനം പറയട്ടെ.
നട്ടെല്ലുണ്ടെങ്കില് പിണറായി വിജയന് എനിക്കെതിരായ ആരോപണങ്ങള് അന്വേഷിക്കണം. ശുദ്ധമായ മനസ്സിന്റെ ഉടമസ്ഥനാകണം മുഖ്യമന്ത്രി. അതാണ് കേരളം ആഗ്രഹിക്കുന്നത്. ബ്രണ്ണന് കോളേജില് എന്നെ നഗ്നനാക്കി നടത്തിയെന്ന ആരോപണം തെറ്റ്. ജീവിച്ചിരിക്കുന്ന ആരോടെങ്കിലും അന്വേഷിച്ചാല് അത് മനസിലാകും. പിണറായി ഏതോ സ്വപ്ന ലോകത്താണ്. ആരോപണം തെളിയിച്ചാല് എല്ലാ പണിയും നിര്ത്താമെന്നും കെ സുധാകരന് കൂട്ടിച്ചേര്ത്തു.
