ലഖ്നോ: കോവിഡ് ചികിത്സയെത്തുടര്ന്ന് ഡോക്ടര്മാര്ക്കെതിരായ ന്യൂനപക്ഷങ്ങളുടെ ആക്രമണം വര്ധിക്കുന്നതായി റിപ്പോര്ട്ട്. ഏറ്റവുമൊടുവില് ഉത്തര്പ്രദേശിലെ ലഖ്നോവില് ഡോ. സന്ദീപ് ജയ്സ്വാളിന് എതിരായ ആക്രമണം അതിരുകടന്നു- രണ്ട് മുസ്ലിം സഹോദരര് ഇദ്ദേഹത്തിനെതിരെ നിറയൊഴിക്കുകയായിരുന്നു. അവരുടെ മൂത്ത ജ്യേഷ്ഠന്റെ കോവിഡ് ചികിത്സയില് വീഴ്ചയുണ്ടായെന്നാരോപിച്ചായിരുന്നു വെടിവെപ്പ്.
അമീറും റഷീദും ചേര്ന്ന് ഡോക്ടര് സന്ദീപ് ജയ്സ്വാളിനെ വെടിവെക്കുന്നതിന്റെ സിസിടിവി ദൃശ്യങ്ങള് പൊലീസിന് ലഭിച്ചു. ലഖ്നോവിലെ ഹര്ഷിത് ഹോസ്പിസ്റ്റല് ആന്റ് ട്രോമ സെന്ററിന്റെ ഉടമസ്ഥനാണ് ഡോ. സന്ദീപ് ജയ്സ്വാള്. ജോലി കഴിഞ്ഞ് വീട്ടില് പോവുകയായിരുന്ന ഡോക്ടറെ അമീറും റഷീദും ചേര്ന്ന് എസ് യുവില് പിന്തുടര്ന്നു. വീടിന്റെ 200 മീറ്റര് അകലെ വെച്ച് തടഞ്ഞു. പിന്നീട് കാറിന്റെ ചില്ല് തകര്ത്ത് അടുത്ത് നിന്ന് വെടിവെക്കുകയായിരുന്നു.
ഒരു വെടിയുണ്ട ഡോക്ടറുടെ തലയോട്ടി തുളച്ച് കയറി. താടിയെല്ലിനും തലയുടെ പിന്ഭാഗത്തിനും ഇടയിലൂടെയായിരുന്നു ഈ വെടിയുണ്ട കയറിപ്പോയത്. ലഖ്നോവിലെ രാം മനോഹര് ലോഹ്യ ആശുപത്രിയില് പ്രവേശിപ്പിച്ച് ശസ്ത്രക്രിയയിലൂടെ ബുള്ളറ്റ് പുറത്തെടുത്തു.
പൊലീസ് ബുള്ളറ്റ് കേസുകളും മറ്റും കുറ്റകൃത്യം നടന്നയിടത്ത് നിന്നും കണ്ടെടുത്തു. സിസിടിവിയില് അമീറും റഷീദും ഉപയോഗിച്ച വെള്ള എസ് യുവി ഫോര്ച്യുണ് കാര് തിരിച്ചറിഞ്ഞു. പിന്നീട് പൊലീസ് അന്വേഷണത്തില് ഈ വാഹനം കണ്ടെടുത്തു.
ഇവരുടെ ജ്യേഷ്ഠസഹോദരനായ ഖാലിദ് അപ്പോളോ ആശുപത്രിയില് കോവിഡ് ചികിത്സയെത്തുടര്ന്ന് മരണപ്പെട്ടിരുന്നു. സഹോദരന്റെ മരണവും ഉയര്ന്ന ബില്ലുമാണ് അമീറിനെയും റഷീദിനെയും ചൊടിപ്പിച്ചത്. ഡോ. ജയ്സ്വാളാണ് ഇതിന് പിന്നിലെന്ന് സഹോദരന്മാര് തീരുമാനിക്കുകയായിരുന്നു. പിന്നീട് ഡോക്ടറെ വധിക്കാനായി ഇവരുടെ ശ്രമം.
കോവിഡ് രണ്ടാം തരംഗത്തില് ആയിരക്കണക്കിന് പേരാണ് മരിച്ചത്. നൂറുകണക്കിന് ഡോക്ടര്മാരും നഴ്സുമാരും മുന്നണിപ്പോരാളികളും ജീവന് ത്യജിച്ചു. ഇത്തരം സംഭവങ്ങളില് ഡോക്ടര്മാരെ അക്രമിക്കുന്ന മാര്ഗ്ഗം സ്വീകരിക്കുന്നത് ശരിയല്ലെന്നാണ് വിദഗ്ധര് അഭിപ്രായപ്പെടുന്നത്. മരണങ്ങള് സംഭവിക്കുന്ന കേസുകളില് ഡോക്ടര്മാര്ക്കെതിരെ ചിലര് തിരിയുന്നതിനെതിരെ നിരവധി പരാതികള് അധികൃതര്ക്ക് ലഭിക്കുന്നുണ്ട്. ഡോക്ടര്മാരുടെ സംഘടനയായ ഇന്ത്യന് മെഡിക്കല് അസോസിയേഷനും (ഐഎംഎ) ഇതിനെതിരെ പ്രതികരിച്ചിരുന്നു.
കോവിഡ് ചികിത്സാപിഴവ് ആരോപിച്ചാണ് ഇന്ത്യയില് പല സംസ്ഥാനങ്ങളിലും ഡോക്ടര്മാര്ക്കെതിരായ ആക്രമണങ്ങള് അരങ്ങേറുന്നത്. രോഗി മരിക്കുമ്പോള് പലപ്പോഴും ബന്ധുക്കള് അതിവൈകാരികമായി പ്രതികരിക്കുന്ന സന്ദര്ഭങ്ങളാണ് ഇതില് കൂടുതലും. അസം, ബംഗാള്, യുപി എന്നിവിടങ്ങളില് നിന്നും നിരവധി കേസുകള് റിപ്പോര്ട്ടു ചെയ്തിരുന്നു.
