കോഴിക്കോട് : മുട്ടില് മരംമുറിക്കല് കേസില് എന്ഫോഴ്സ്മെന്റ് അന്വേഷണം നടത്തുന്നു. ഇതുമായി ബന്ധപ്പെട്ട് കള്ളപ്പണ ഇടപാട് നടന്നിട്ടുണ്ടോയെന്ന് പരിശോധിക്കുന്നതിനാണ് ഇത്. ഈ മാസം മൂന്നിന് വനം വകുപ്പിന് എന്ഫോഴ്സ്മെന്റ് കത്ത് നല്കി കഴിഞ്ഞു.
മുട്ടില് മരംമുറിയുടെ വിശാദംശങ്ങള് തേടിയാണ് ഇഡി ഇപ്പോള് കത്ത് നല്കിയിരിക്കുന്നത്. കേസുമായി ബന്ധപ്പെട്ട പരാതി, എഫ്ഐആര്, മഹസ്സര് എന്നിവയുടെ പകര്പ്പ് ഇതുവരെ ശേഖരിച്ച വിവരങ്ങളുടെ വിശദാംശങ്ങളും നല്കാന് എന്ഫോഴ്സ്മെന്റ് വനം വകുപ്പിനോട് ആവശ്യപ്പെട്ട് കഴിഞ്ഞു. എന്നാല് കത്തുനല്കി ഒരാഴ്ച കഴിഞ്ഞിട്ടും സര്ക്കാരോ വനംവകുപ്പോ ഇതില് തീരുമാനം എടുത്തിട്ടില്ല. എന്ഫോഴ്സ്മെന്റിന് വിശദാംശങ്ങള് നല്കുന്നതിന് മുമ്പ് സര്ക്കാര് തീരുമാനം കൂടി വരട്ടേയെന്നാണ് വനംവകുപ്പിന്റെ നിലപാട്.
അതേസമയം മുട്ടില് മരംകൊള്ളയെ കുറിച്ച് മുന് വനം മന്ത്രി കെ. രാജുവിന് അറിയാമായിരുന്നുവെന്ന് വെളിപ്പെടുത്തല്. മരം മുറിക്കല് തടഞ്ഞില്ലെങ്കില് സര്ക്കാറിന് കോടികളുടെ നഷ്ടമുണ്ടാകുമെന്ന് മുന് മന്ത്രിയെ അറിയിച്ചിരുന്നെങ്കിലും നടപടി സ്വീകരിച്ചില്ലെന്നും പ്രതി റോജി അഗസ്റ്റിന്റെ സുഹൃത്തും മരം വ്യാപാരിയുമായ ബെന്നി കുറ്റപ്പെടുത്തി. സ്വകാര്യ മാധ്യമത്തോടാണ് ഈ വെളിപ്പെടുത്തല് നടത്തിയത്.
കോടിക്കണക്കിന് രൂപയുടെ മരങ്ങളാണ് മുട്ടിലില്നിന്ന് മുറിച്ചുകടത്തിയത്. കോടിക്കണക്കിന് രൂപയുടെ ഇടപാട് നടക്കുമ്പോള് അത് കള്ളപ്പണം ആയേക്കുമെന്ന ധാരണയുടെ അടിസ്ഥാനത്തിലാണ് ഇ.ഡി.യുടെ നീക്കം. കത്തിന് വനംവകുപ്പ് മറുപടി നല്കാതിരിക്കുന്ന പക്ഷം ഇ.ഡി. നിയമപരമായി നീങ്ങിയേക്കും. അങ്ങനെയെങ്കില് ഇ.ഡി. നോട്ടീസ് നല്കാനും സാധ്യതയുണ്ട്.
