അഗര്‍ത്തല: ഫെയ്‌സ്ബുക്കില്‍ താന്‍ നടത്തിയ അഭ്യര്‍ഥന ശ്രദ്ധിച്ച് പഠിക്കാന്‍ മേശയും മരുന്നുകളും ഭക്ഷണ പായ്‌ക്കറ്റുകളും മുഖ്യമന്ത്രി ബിപ്ലബ് കുമാര്‍ ദേബ് നല്‍കിയ സന്തോഷത്തിലാണ് എട്ടാം ക്ലാസ് വിദ്യാര്‍ഥിനിയായ ബര്‍ഷ ദാസ്. താത്ക്കാലിക മുറിയിലാണ് നാലു പേരടങ്ങിയ കുടുംബം താമസിക്കുന്നതെന്നും പഠനമേശ വാങ്ങാന്‍ കഴിവില്ലെന്നും അടുത്തിടെ പോസ്റ്റ് ചെയ്ത മുഖ്യമന്ത്രിക്കുള്ള വീഡിയോയില്‍ പെണ്‍കുട്ടി സൂചിപ്പിച്ചിരുന്നു. ഈ ആഴ്ച ആദ്യം പോസ്റ്റ് ചെയ്ത മറ്റൊരു സന്ദേശത്തില്‍ അമ്മയ്‌ക്ക് കോവിഡ് ബാധിച്ചുവെന്നും മരുന്നും ഭക്ഷണവും ആവശ്യമാണെന്നും 14-കാരിയായ ബര്‍ഷ പറഞ്ഞിരുന്നു.
പെണ്‍കുട്ടിയുടെ അഭ്യര്‍ഥന ശ്രദ്ധയില്‍ പെട്ടയുടനെ സാധ്യമായ സഹായങ്ങളെത്തിച്ചു നല്‍കാന്‍ ഉദ്യോഗസ്ഥരോട് മുഖ്യമന്ത്രി ആവശ്യപ്പെടുകയായിരുന്നുവെന്ന് സര്‍ക്കാര്‍ വൃത്തങ്ങള്‍ അറിയിച്ചു. തുടര്‍ന്ന് വെള്ളിയാഴ്ച അഗര്‍ത്തലയുടെ പ്രാന്തപ്രദേശത്ത് താമസിക്കുന്ന ബര്‍ഷയുടെ വീട്ടില്‍ സഹായങ്ങള്‍ എത്തിച്ചു നല്‍കി. ‘മുഖ്യമന്ത്രിയുടെ നടപടി തന്നെ സ്വാധീനിച്ചു. പഠനമേശയും ഭക്ഷണവും അമ്മയ്‌ക്ക് മരുന്നും നല്‍കി. അച്ഛന് കാര്യമായ വരുമാനമില്ല. സാമ്പത്തിക പ്രതിസന്ധിയിലൂടെയാണ് ഏപ്പോഴും പോകുന്നത്. മുഖ്യമന്ത്രി അയച്ചുനല്‍കിയ സഹായം തീര്‍ച്ചയായും ഞങ്ങളുടെ കുറച്ച് പ്രശ്‌നങ്ങള്‍ പരിഹരിക്കും’.-ബര്‍ഷ ദാസ് പിടിഐയോട് പറഞ്ഞു.
മകള്‍ മുഖ്യമന്ത്രിയോട് സഹായം ചോദിച്ചതിനെപ്പറ്റി അറിയില്ലായിരുന്നുവെന്ന് സ്വകാര്യസ്ഥാപനത്തില്‍ ജോലി ചെയ്യുന്ന ബര്‍ഷയുടെ അച്ഛന് ഉത്തം ദാസ് പ്രതികരിച്ചു. പഠനമേശയും മരുന്നുകളും പലവ്യഞ്ജനകളും ഭക്ഷണപൊതികളുമായി കുറച്ചാളുകള്‍ മുഖ്യമന്ത്രിയുടെ ഓഫിസില്‍നിന്ന് വീട്ടിലെത്തിയപ്പോള്‍ ആശ്ചര്യപ്പെട്ടുവെന്ന് അദ്ദേഹം കൂട്ടിച്ചേര്‍ത്തു. മുഖ്യമന്ത്രിയോട് എങ്ങനെ നന്ദി പറയണമെന്ന് ഉത്തം ദാസിന് അറിയില്ല. സമൂഹമാധ്യമങ്ങളില്‍ ബിപ്ലബ് ദേബ് കുമാര്‍ സജീവമാണെന്നും ജനങ്ങളിലെത്താനുള്ള ഫലപ്രദമായ വഴിയാണിതെന്ന് അദ്ദേഹം കരുതുന്നതായും മുഖ്യമന്ത്രിയുടെ മാധ്യമ ഉപദേഷ്ടാവ് സഞ്ജയ് മിശ്ര പറഞ്ഞു.
