നരകങ്ങള് എണ്പത്തിയാറെണ്ണം. അതില് വെച്ച് ഏറ്റവും ഭയാനകമാണ് കുംഭീപാകം. ദേവന്മാരെ നിന്ദിക്കുന്നവരെയും മാതാപിതാക്കളെ അവഹേളിക്കുന്നവരെയും അവരെ സംരക്ഷിക്കാത്തവരെയും ഈ നരകത്തിലിട്ടാണ് ശിക്ഷിക്കുന്നത്. അവിടുത്തെ അന്തരീക്ഷമെപ്പോഴും രോദനത്താല് നിറഞ്ഞിരിക്കും.
കുഭീപാകത്തിലെ വിലാപം കേട്ട ദുര്വാസാവ് മഹര്ഷിക്ക് ആ നരകമൊന്ന് കാണാന് ആഗ്രഹം തോന്നി. അനുവാദം വാങ്ങി ദുര്വാസാവ് നരക കവാടത്തില് ചെന്ന് ഒന്ന് എത്തി നോക്കി. എന്തൊരത്ഭുതം! ഇതുവരെ കരച്ചില് കേട്ടിടത്ത് ചിരിയും കളിയും പാട്ടും ആട്ടവും നടക്കുന്നു. എല്ലാവരും സന്തുഷ്ടരാണ്. എന്താണീ മാറ്റത്തിന് കാരണം? യമകിങ്കരന്മാര് പറഞ്ഞറിഞ്ഞ് യമനും വിഷ്ണുവും അവിടെയെത്തി. ആര്ക്കും കാരണം കണ്ടുപിടിക്കാന് സാധിച്ചില്ല.
ഒടുവില് വിഷ്ണു കൈലാസത്തിലേക്ക് പോയി, നടന്നതെല്ലാം ശ്രീശങ്കരനോട് വിവരിച്ചു. ശ്രീശങ്കരന് പറഞ്ഞു: ദുര്വാസാവു മഹര്ഷി എത്തി നോക്കിയപ്പോള് അദ്ദേഹം ധരിച്ചിരുന്ന ഭസ്മത്തില് നിന്നും അല്പം കാറ്റടിച്ച് പറന്ന് ആ നരകത്തില് വീണതാണ് കാരണം. അന്നു മുതല് ആ നരകം പിതൃതീര്ഥം എന്ന പേരില് പുണ്യതീര്ഥമായി മാറി. ശ്രീശങ്കരന്റെ അഭിലാഷമനുസരിച്ച് ദേവകള് ശിവനെയും ഉമയേയും ആ തീര്ഥതീരത്ത് പ്രതിഷ്ഠിച്ചു.
(ദേവീഭാഗവതം പതിനൊന്നാം സ്കന്ധം)
സമ്പാ: ദിവാകരന് നായര് കുന്നപ്പള്ളി
