ഗോകുലത്തില് ഒരു ധനികന്റെ വീട്ടില് ധാരാളം വെണ്ണ ശേഖരിച്ചു വെച്ചിട്ടുണ്ടെന്നറിഞ്ഞ് ശ്രീകൃഷ്ണന് ഗോപന്മാരോടൊത്ത് ആ സ്ഥലത്തെത്തി. വീടിന്റെ ഏറ്റവും ഉള്ളിലായി ഒരു മുറിയിലായിരുന്നു വെണ്ണ സൂക്ഷിച്ചിരുന്നത്. അവര് അതു മനസ്സിലാക്കി എങ്ങിനെയൊക്കെയോ ആ മുറിയിലേക്കു കടന്ന് വെണ്ണ മതിയാവോളം ഭക്ഷിച്ചു. എന്നാല് ഇതൊന്നും അറിയാതെ വീട്ടുടമസ്ഥന് അതിനിടക്കു വീടു പൂട്ടി പുറത്തേക്കു പോയി.
പുറത്തുനിന്നും പൂട്ടിയ ആ വീട്ടില്നിന്നും രക്ഷപ്പെടുക എന്നതു അവര്ക്ക് ഒരു പ്രശ്നമായി. അപ്പോള് സര്വ്വേശ്വരനായ ശ്രീകൃഷ്ണന് കുട്ടികളോടു പറഞ്ഞു, ”പേടിക്കേണ്ട, ചങ്ങാതിമാരെ, ഞാന് നിങ്ങളെ സുരക്ഷിതരായി പുറത്തു കടത്താം. പക്ഷേ നിങ്ങള് എല്ലാവരും കണ്ണടച്ചു നില്ക്കണം.” എല്ലാവരും അനുസരിച്ചു. പക്ഷേ അവരില് ഒരു ഗോപബാലന്മാത്രം, തങ്ങളെ ശ്രീകൃഷ്ണന് എങ്ങിനെയാണ് രക്ഷപ്പെടുത്തുക എന്ന് അറിയാനുള്ള ആകാംക്ഷയാല് കണ്ണു പകുതിമാത്രമേ അടച്ചുള്ളു. ശ്രീകൃഷ്ണനെ സംശയംകൂടാതെ അനുസരിച്ച എല്ലാ കുട്ടികളും അത്ഭുതകരമായി പുറത്തെത്തി. പക്ഷേ സംശയാലുവായ ആ ഗോപബാലന്മാത്രം മുറിയുടെ ഉള്ളില് കുടുങ്ങി.
വീട്ടുടമസ്ഥന് മടങ്ങി വന്ന് വീടു തുറന്ന് ആ മുറിയിലേക്കു വന്നപ്പോള് ആ ഗോപബാലനെ മുറിയില് കണ്ടു. അയാള് ദേഷ്യത്തോടെ അവനെ കടന്നു പിടിച്ചു. ഒരു വടികൊണ്ട് പൊതിരെ തല്ലിയിട്ട് കലിതുള്ളിക്കൊണ്ടു ചോദിച്ചു, ”നീയാണല്ലേ എന്നും ഇവിടെ കടന്ന് വെണ്ണ കട്ടു തിന്നുന്ന കള്ളന്?”
ഈശ്വരനെ സംശയിക്കുന്നവര്ക്കു ദുരിതങ്ങള് അനുഭവിക്കേണ്ടി വരുമെന്നാണ് ഇതിലൂടെ അമ്മ നല്കിയ സന്ദേശം.
ശ്രീരമാദേവിമാതാവിന്റെ വചനങ്ങള്
സമ്പാ: കെ.എന്.കെ. നമ്പൂതിരി
