കോഴിക്കോട്: കോഴിക്കോട് റെയില്‍വെ സ്റ്റേഷനില്‍ കൊവിഡ് പ്രതിരോധ പ്രവര്‍ത്തനങ്ങളില്‍ നിറസാന്നിധ്യമാവുകയാണ് സേവാഭാരതി. റെയില്‍വെ ആവശ്യപ്പെട്ടതനുസരിച്ചാണ് 2020 ജൂണ്‍ ഒന്ന് മുതല്‍ സേവാഭാരതി പ്രവര്‍ത്തകര്‍ റെയില്‍വേ സ്റ്റേഷനില്‍ സന്നദ്ധ പ്രവര്‍ത്തനം ആരംഭിച്ചത്. രാത്രിയിലും പകലുമായെത്തുന്ന ട്രെയിനുകളില്‍ നിന്ന് ഇറങ്ങി വരുന്ന യാത്രക്കാരെ തെര്‍മല്‍ സ്‌ക്രീനിങ്ങ് നടത്തുകയെന്നതാണ് പ്രധാന പ്രവര്‍ത്തനം.
അതിനു പുറമെ അവരെ സാമൂഹിക അകലം പാലിച്ചു നിര്‍ത്തുക, അവര്‍ക്കു വേണ്ട സഹായങ്ങളും നിര്‍ദ്ദേശങ്ങളും നല്‍കുക എന്നീ പ്രവര്‍ത്തനങ്ങളുമുണ്ട്. ശാരീരിക അസ്വാസ്ഥ്യം അനുഭവപ്പെടുന്നവര്‍ക്ക് ചികിത്സാ സൗകര്യമൊരുക്കുന്നതിനും സേവാഭാരതി പ്രവര്‍ത്തകര്‍ മുന്നിലുണ്ട്. ആദ്യ ഘട്ടത്തില്‍ 192 ദിവസമായിരുന്നു പ്രവര്‍ത്തനം. ഒരു ദിവസം പോലും മുടക്കമില്ലാതെ 24 മണിക്കൂറും ഇവര്‍ കര്‍മ്മരംഗത്തുണ്ടായി. കൊവിഡ് രണ്ടാം തരംഗത്തെ തുടര്‍ന്ന് റെയില്‍വെയുടെ ആവശ്യപ്രകാരം കഴിഞ്ഞ ഏപ്രില്‍ 24 മുതല്‍ വീണ്ടും പ്രതിരോധ പ്രവര്‍ത്തനങ്ങളില്‍ സജീവമായുണ്ട്. എട്ടു മണിക്കൂര്‍ വീതമുള്ള മൂന്ന് ഷിഫ്റ്റുകളിലായുള്ള പ്രവര്‍ത്തനത്തില്‍ കോഴിക്കോട് ജില്ലയിലെ വിവിധ സ്ഥലങ്ങളിലുള്ള സേവാഭാരതി പ്രവര്‍ത്തകരാണ് പങ്കെടുക്കുന്നത്. എട്ടോളം പ്രവര്‍ത്തകര്‍ ഓരോ ദിവസവും സൗജന്യ സേവനമനുഷ്ഠിക്കുന്നു. പ്രതിരോധ പ്രവര്‍ത്തനങ്ങള്‍ക്ക് വേണ്ടി വരുന്ന മാസ്‌ക്, ഗ്ലൗസ്, പിപിഇ കിറ്റ്, സാനിറ്റൈസര്‍ എന്നിവ കൊണ്ടുവരുന്നതും സേവാഭാരതി തന്നെയാണ്.
രാപ്പകലില്ലാതെയുള്ള ഇവരുടെ സേവനം യാത്രക്കാര്‍ക്ക് നല്‍കുന്ന ആശ്വാസം ചെറുതല്ല. സ്റ്റേഷനിലെത്തുന്ന യാത്രക്കാര്‍ക്ക് ട്രെയിനില്‍ കയറുന്നതിന് മുന്നേയുള്ള പരിശോധനകള്‍ പൂര്‍ത്തിയാക്കാന്‍ സന്നദ്ധ പ്രവര്‍ത്തകരുടെ സഹായം അത്യാവശ്യമാണ്. സ്റ്റേഷനില്‍ ഇറങ്ങുന്ന യാത്രക്കാര്‍ക്ക് നിലവിലുള്ള നിയന്ത്രണങ്ങളെക്കുറിച്ചും പുറത്തിറങ്ങാനുള്ള ക്രമീകരണങ്ങളെക്കുറിച്ചും വിവരങ്ങള്‍ നല്‍കുന്നത് സേവാഭാരതിയുടെ സന്നദ്ധ പ്രവര്‍ത്തകരാണ്. സേവാഭാരതിയുടെ സേവാ പ്രവര്‍ത്തനങ്ങളെ പ്രശംസിച്ച് ഗാനരചയിതാവും സംഗീത സംവിധായകനുമായ കൈതപ്രം ദാമോദരന്‍ നമ്പൂതിരി അടക്കമുള്ള സമൂഹത്തിലെ നിരവധി പ്രമുഖര്‍ രംഗത്ത് വന്നത് പ്രവര്‍ത്തകര്‍ക്ക് ഊര്‍ജമേകി.
പ്രതികരിക്കാൻ ഇവിടെ എഴുതുക: