കൊല്‍ക്കത്ത: വ്യാപക അക്രമങ്ങള്‍ നടന്ന ബംഗാളില്‍ ബിജെപി ദേശീയ അധ്യക്ഷന്‍ ജെ.പി. നദ്ദ സന്ദര്‍ശനം ആരംഭിച്ചു. വിവിധ മണ്ഡലങ്ങളില്‍ തൃണമൂല്‍ അക്രമങ്ങള്‍ക്കിരയായ ബിജെപി പ്രവര്‍ത്തകരെ അദ്ദേഹം സന്ദര്‍ശിച്ചു തുടങ്ങി. കൊല്ലപ്പെട്ട പ്രവര്‍ത്തകരുടെ വീടുകളിലെത്തിയ നദ്ദയും സംഘവും തൃണമൂല്‍ നേതൃത്വത്തിനെതിരെ ശക്തമായ ഭാഷയില്‍ പ്രതിഷേധിച്ചു. തെരഞ്ഞെടുപ്പ് ഫലത്തിന് പിന്നാലെ ഇത്രയധികം അസഹിഷ്ണുത പ്രകടിപ്പിക്കുന്ന രാഷ്‌ട്രീയ പാര്‍ട്ടിയെ സ്വതന്ത്ര ഇന്ത്യ കണ്ടിട്ടില്ലെന്ന് നദ്ദ കുറ്റപ്പെടുത്തി.
ബംഗാളില്‍ നടക്കുന്ന അക്രമങ്ങള്‍ നടുക്കുന്നതാണ്. പുറത്തുവരുന്ന വാര്‍ത്തകള്‍ ഭീതിപ്പെടുത്തുന്നു. ഇന്ത്യാ വിഭജന കാലത്ത് മാത്രമാണ് ഇത്തരത്തിലുള്ള അക്രമങ്ങള്‍ അരങ്ങേറിയത്, സൗത്ത് 24 പര്‍ഗനാസില്‍ അക്രമങ്ങള്‍ക്കിരയായ പ്രവര്‍ത്തകരെ കണ്ട ശേഷം നദ്ദ പ്രതികരിച്ചു.
തെരഞ്ഞെടുപ്പിന് ശേഷം സംഘര്‍ഷം തുടരുന്ന പശ്ചിമ ബംഗാളില്‍ എത്തിയ ബിജെപി ദേശീയ പ്രതിനിധി സംഘത്തില്‍ ദേശീയ ജനറല്‍ സെക്രട്ടറിമാരായ ഭൂപേന്ദ്ര യാദവ് എം.പി, ദുഷ്യന്ത് ഗൗതം എം.പി, ശിവ പ്രകാശ് ജി എന്നിവരും കേന്ദ്രമന്ത്രി വി. മുരളീധരനുമുണ്ട്. സിപിഎം ഭരണം തകര്‍ത്തെറിഞ്ഞ ബംഗാളില്‍ വീണ്ടും ദുരിതം വിതയ്‌ക്കുകയാണ് മമത ബാനര്‍ജിയുടെ ഏകാധിപത്യമെന്ന് വി. മുരളീധരന്‍ കുറ്റപ്പെടുത്തി. വംഗനാട്ടില്‍ സമാധാന സ്ഥാപനമെന്ന ലക്ഷ്യത്തോടെയാണ് സന്ദര്‍ശനമെന്നും മുരളീധരന്‍ പറഞ്ഞു.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: