ആലപ്പുഴ : കൃത്രിമ ഗര്ഭധാരണത്തിലൂടെ റിട്ടയേര്ഡ് അധ്യാപികയ്ക്ക്് ലഭിച്ച മാലാഖ കുഞ്ഞ് യാത്രയായി. പ്രസവ ശേഷം ആരോഗ്യസ്ഥിതി മെച്ചപ്പെട്ട ശിശുവിനെ വീട്ടിലേക്ക് കൊണ്ടുപോയിരുന്നു. തുടര്ന്ന് പാല് തൊണ്ടയില് കുടുങ്ങി തിങ്കളാഴ്ച രാത്രിയോടെ മരിക്കുകയായിരുന്നു.
71 കാരിയായ രാമപുരം സ്വദേശിയായ അധ്യാപിക സുധര്മ്മ മാര്ച്ച് 18നാണ് ആലപ്പുഴ മെഡിക്കല് കോളേജ് ആശുപത്രിയില് പെണ്കുഞ്ഞിന് ജന്മം നല്കിയത്. ഒന്നര വര്ഷം മുന്പ് 35 വയസ്സുള്ള ഇവരുടെ മകന് സുജിത് സൗദിയില് മരിച്ചതിനെ തുടര്ന്ന് ഒരു കുഞ്ഞു കൂടി വേണമെന്നു സുധര്മ്മയും ഭര്ത്താവ് റിട്ടയേര്ഡ് പോലീസ് ടെലി കമ്യൂണിക്കേഷന് ഓഫീസറായ സുരേന്ദ്രനും ആഗ്രഹിക്കുകയായിരുന്നു.
തുടര്ന്ന് ആലപ്പുഴ മെഡിക്കല് കോളേജില് എത്തുകയും കൃത്രിമ ഗര്ഭധാരണം സ്വീകരിക്കുകയുമായിരുന്നു. ശസ്ത്രക്രിയയിലൂടെ ജനിച്ച കുഞ്ഞിനു തൂക്കവും പ്രതിരോധ ശക്തിയും കുറവായതിനാല് 40 ദിവസം ആശുപത്രിയില് നിരീക്ഷണത്തിലായിരുന്നു.
ആരോഗ്യ സ്ഥിതി മെച്ചപ്പട്ടതോടെ കഴിഞ്ഞ 28നു രാമപുരത്തെ വീട്ടില് കൊണ്ടുവന്നു. തൂക്കം 1100 ല് നിന്നും 1400ലേക്ക് ഉയര്ന്നെന്ന സന്തോഷതത്തിലിരിക്കേയാണ് കുട്ടി മരിക്കുന്നത്. തിങ്കളാഴ്ച വൈകിട്ട് പാല് തൊണ്ടയില് കുടുങ്ങി അസ്വസ്ഥതയുണ്ടായ കുഞ്ഞിനെ ഉടന് ആലപ്പുഴ മെഡിക്കല് കോളജ് ആശുപത്രിയില് എത്തിച്ചെങ്കിലും രാത്രിയോടെ മരിക്കുകയായിരുന്നു. സുധര്മ്മയുടേയും സുരേന്ദ്രന്റേയും 45 ദിവസത്തോളം നീണ്ടു നിന്ന പ്രതീക്ഷയുടെ കിരണമാണ് ഇതോടെ ഇല്ലാതായത്.
