ന്യൂദല്‍ഹി: കൊറോണയുടെ രണ്ടാം തരംഗം രാജ്യത്ത് ശക്തമാകുന്നതിനിടയില്‍ ഇന്ത്യയ്‌ക്ക് പിന്തുണയുമായി ലോകരാജ്യങ്ങള്‍. ഇതിനോടകം 40 ല്‍ അധികം രാജ്യങ്ങള്‍ പലവിധത്തിലുള്ള സഹായവാഗ്ദാനവുമായി കേന്ദ്ര സര്‍ക്കാരിനെ സമീപിച്ചതായി കേന്ദ്ര വിദേശകാര്യമന്ത്രി എസ് ജയശങ്കര്‍ പറഞ്ഞു. വാക്‌സിന്‍ നയതന്ത്രം വഴിയും മറ്റുസഹായങ്ങള്‍ നല്‍കിയും കൊവിഡ് കാലത്ത് മറ്റുരാജ്യങ്ങളെ സഹായിച്ചത് ഇപ്പോള്‍ ഇന്ത്യയ്‌ക്ക് ഉപകരിക്കപ്പെടുകയാണെന്ന് മന്ത്രി പ്രതികരിച്ചു.
അതേ സമയം ഇന്ത്യയിലെ കോവിഡ് പ്രതിരോധത്തിനായുള്ള സഹായവുമായി യുഎസ് വിമാനം ദല്‍ഹിയിലെത്തി. കോവിഡ് രണ്ടാം തരംഗത്തില്‍ ഇന്ത്യയ്‌ക്ക് എല്ലാവിധ സഹായങ്ങളും നല്‍കുമെന്ന് യുഎസ് പ്രസിഡന്റ് ബൈഡന്‍ കഴിഞ്ഞ ദിവസം വ്യക്തമാക്കിയിരുന്നു. ഇതിനെ തുടര്‍ യുഎസ് സൈന്യത്തിന്റെ സൂപ്പര്‍ ഗ്യാലക്‌സി ട്രാന്‍പോര്‍ട്ട് വിമാനത്തിലാണ് ഇന്ന് രാവിലെയാണ് മെഡിക്കല്‍ ഉപകരണങ്ങള്‍ എത്തിച്ചിരിക്കുന്നത്.
കോവിഡ് വ്യാപനത്തിന്റെ ആദ്യഘട്ടത്തില്‍ ഇന്ത്യ യുഎസിന് കൈത്താങ്ങായിരുന്നു. ഇപ്പോള്‍ ഇന്ത്യയില്‍ കോവിഡ് വ്യാപിക്കുന്ന സാഹചര്യത്തില്‍ സഹായിക്കേണ്ടത് യുഎസിന്റെ കടമയാണെന്ന് കഴിഞ്ഞ ദിവസം പ്രസിഡന്റ് ബൈഡന്‍ വ്യക്തമാക്കിയിരുന്നു. അതിനു പിന്നാലെയാണ് പ്രത്യേക വിമാനം തലസ്ഥാനത്ത് എത്തിയത്.
400 ഓക്‌സിജന്‍ സിലിണ്ടര്‍, മറ്റ് ആശുപത്രി ഉപകരണങ്ങള്‍, പത്ത് ലക്ഷം പരിശോധന കിറ്റുകള്‍ എന്നിവയാണാണ് സൂപ്പര്‍ ഗ്യാലക്‌സി എത്തിച്ചു നല്‍കിയിരിക്കുന്നതെന്നാണ് വാര്‍ത്താ എജന്‍സി റിപ്പോര്‍ട്ട് ചെയ്യുന്നത്. മെഡിക്കല്‍ ഉപകരണങ്ങളുമായി മറ്റൊരു വിമാനം കൂടി ഇന്ന് എത്തിയേക്കുമെന്നാണ് പരതീക്ഷിക്കുന്നത്. ഇത് കൂടാതെ വരും ദിവസങ്ങളില്‍ കൂടുതല്‍ വിമാനങ്ങള്‍ സഹായവുമായി ഇന്ത്യയില്‍ എത്തിയേക്കും.
