മണ്ണാര്ക്കാട്: പത്ത് ലക്ഷം രൂപ കൊള്ളയടിച്ച ആറംഗസംഘത്തിലെ ഒളിവില് കഴിയുകയായിരുന്ന മുഖ്യപ്രതിയെ നാട്ടുകല് പോലീസ് അറസ്റ്റു ചെയ്തു. പഴയ സ്വര്ണ്ണം വില്ക്കാനുണ്ടെന്ന് പറഞ്ഞ് കോഴിക്കോട് സ്വദേശിയെ എടത്തനാട്ടുകര, ചൂരിക്കോട്ടെ റബ്ബര് തോട്ടത്തില് വിളിച്ചുവരുത്തിയാണ് ആറംഗ സംഘം പത്ത് ലക്ഷം രൂപ കൊള്ളയടിച്ചത്.
കോങ്ങാട് പൂതംകോട് സ്വദേശി ശ്യാം (28) നെയാണ് ശനിയാഴ്ച രാത്രി പുതുശ്ശേരി ഒളിസങ്കേതത്തില്നിന്നും പാലക്കാട് ഡാന്സാഫ് സ്ക്വാഡിന്റെ സഹായത്തോടെ പിടികൂടിയത്. കഴിഞ്ഞവര്ഷം മെയ് 28ന് നടന്ന സംഭവത്തില് നാലു പ്രതികളെ നാട്ടുകല് പോലീസ് അറസ്റ്റുചെയ്തിരുന്നു. ഒളിവില് പോയ മുഖ്യപ്രതി ശ്യാം തമിഴ്നാട്ടിലും മറ്റും ഒളിവില് കഴിയുകയായിരുന്നു. ഇയാള് പാലക്കാടെത്തിയതായി രഹസ്യവിവരം ലഭിച്ചതിനെതുടര്ന്നായിരുന്നു അറസ്റ്റ്.
പ്രതി നിലവില് നടത്തിവരുന്ന നിര്മാണ പദ്ധതിയെക്കുറിച്ചും അന്വേഷണം ആരംഭിച്ചു. ഹൈഡ്രോ വാലി പ്രൊജക്റ്റ് എന്ന പേരില് രൂപീകരിച്ച കമ്പനിക്കു പിന്നില് കോടികളുടെ ഇടപാടാണ് നടത്തിവരുന്നത്. ആഡംബര കാറിലാണ് പ്രതി യാത്ര ചെയ്യുന്നത്. ഇയാളെ മണ്ണാര്ക്കാട് കോടതിയില് ഹാജരാക്കി റിമാന്ഡ് ചെയ്തു.
നാട്ടുകല് ഇന്സ്പെക്ടര് ഹിദായത്തുള്ള മാമ്പ്ര, സബ് ഇന്സ്പെക്ടര് ഗ്ലാഡിങ്ങ്, എഎസ്ഐ അരവിന്ദാക്ഷന്, എസിസിപിഒമാരായ അബ്ദുള് നവാസ്, ബിനു, ഡാന്സാഫ് സ്ക്വാഡ് അംഗങ്ങളായ ടി.ആര്. സുനില് കുമാര്, റഹിം മുത്തു, സൂരജ് ബാബു, കെ. അഹമ്മദ് കബീര്, കെ. ദിലീപ്, ആര്. രാജീദ് എന്നിവരടങ്ങിയ സംഘമാണ് പ്രതിയെ പിടികൂടിയത്.
