തിരുവനന്തപുരം: മന്ത്രി കെ.ടി. ജലീല്‍ നടത്തിയ സത്യപ്രതിജ്ഞാലംഘനത്തില്‍ മുഖ്യമന്ത്രി പിണറായി വിജയനും പങ്ക്. ന്യൂനപക്ഷ വികസന കോര്‍പ്പറേഷന്‍ ജനറല്‍ മാനേജറിനുള്ള യോഗ്യത തിരുത്താന്‍ നിര്‍ദേശിക്കുന്ന ഫയലില്‍ മുഖ്യമന്ത്രി പിണറായി വിജയന്‍ ഒപ്പുവെച്ചതിന്റെ വിവരങ്ങളാണ് പുറത്തുവരുന്നത്. ഉത്തരവിറങ്ങിയത് മന്ത്രിസഭ അറിയാതെ. യോഗ്യത തിരുത്തിയ ഉത്തരവിറക്കുന്നത് അറിഞ്ഞത് മുഖ്യമന്ത്രിയുടെയും ജലീലിന്റെയും ഓഫീസ് മാത്രം. മന്ത്രിസഭ അറിയേണ്ടതില്ലെന്ന ജലീലിന്റെ കുറിപ്പിന് പിന്നാലെ മുഖ്യമന്ത്രി ഫയലില്‍ ഒപ്പിട്ടത് ഉദ്യോഗസ്ഥരുടെ വിയോജനക്കുറിപ്പ് മറികടന്ന്.
നിയമനം ക്രമക്കേടാണെന്നും സത്യപ്രതിജ്ഞാ ലംഘനവും സ്വജനപക്ഷപാതവും നടത്തിയ ജലീലിനെ പുറത്താക്കണമെന്നും ലോകായുക്ത ആവശ്യപ്പെട്ടിരുന്നു. കഴിഞ്ഞ ദിവസങ്ങളില്‍ ജലീലിന്റെ രാജിക്ക് സമ്മര്‍ദ്ദമേറിയപ്പോള്‍ സംരക്ഷിക്കാനാണ് സിപിഎം ശ്രമിച്ചത്. തൊട്ടുപിന്നാലെയാണ് മുഖ്യമന്ത്രിയുടെ പങ്കും വ്യക്തമാക്കുന്ന വിവരങ്ങള്‍ പുറത്തുവന്നത്.
ജലീലിന്റെ ബന്ധു അദീബിനെ ന്യൂനപക്ഷ വികസന കോര്‍പ്പറേഷന്‍ ജനറല്‍ മാനേജരായി നിയമിക്കാന്‍ മുഖ്യമന്ത്രിയടക്കം കൂട്ടുനിന്നു എന്ന തെളിവുകളാണ് പുറത്തുവന്നത്. അദീബിന്റെ യോഗ്യതക്ക് അനുസരിച്ച് തസ്തികയുടെ യോഗ്യത മാറ്റിക്കൊണ്ട് ഉത്തരവിറക്കിയിരുന്നു. ഇത് മുഖ്യമന്ത്രിയുടെ അറിവോടെയായിരുന്നു. അതേസമയം, മന്ത്രിസഭയുടെ അനുമതിയില്ലാതെയായിരുന്നുവെന്നുമാണ് ഫയലുകള്‍ വ്യക്തമാക്കുന്നത്. യോഗ്യതയില്‍ തിരുത്തല്‍ ആവശ്യപ്പെട്ട് 2016 ജൂലൈ 28നാണ് ജലീല്‍ ന്യൂനപക്ഷ ക്ഷേമ സെക്രട്ടറിക്ക് കത്ത് നല്‍കുന്നത്.
എന്നാല്‍, ഈ തിരുത്തലിന് നിയമസഭയുടെയും ധനകാര്യ വകുപ്പിന്റെയും അനുമതി വേണ്ടതല്ലേയെന്ന ചോദ്യവുമായി ഫയല്‍ തിരികെ അയച്ചു. കോര്‍പ്പറേഷന്‍ തസ്തികയിലേക്കുള്ള യോഗ്യത നിശ്ചയിച്ചത് മന്ത്രിസഭയുടെയും ധനകാര്യ വകുപ്പിന്റെയും അനുമതിയോടെ ആയിരുന്നു. അതിനാല്‍, യോഗ്യതയില്‍ മാറ്റംവരുത്തുമ്പോള്‍ അതിന് മന്ത്രിസഭയുടെയും ധനകാര്യ വകുപ്പിന്റെയും അനുമതി വേണം. ഇത് ജലീല്‍ അവഗണിച്ചു. മന്ത്രിസഭയുടെ അനുമതി വേണ്ടെന്ന കുറിപ്പോടെ ഫയല്‍ മുഖമന്ത്രിക്ക് അയച്ചു. 2016 ആഗസ്ത് ഒമ്പതിന് ഫയലില്‍ മുഖ്യമന്ത്രിയും ഒപ്പിട്ടു. ഇതോടെയാണ് യോഗ്യത തിരുത്തി ഉത്തരവിറങ്ങിയത്.
തുടര്‍ന്നാണ് സൗത്ത് ഇന്ത്യന്‍ ബാങ്ക് മാനേജരായ അദീബിനെ നിയമിക്കണമെന്ന നിര്‍ദ്ദേശം ജലീല്‍ നല്‍കുന്നത്. എന്നാല്‍, ആര്‍ബിഐ ഷെഡ്യൂള്‍ പ്രകാരം സൗത്ത് ഇന്ത്യന്‍ ബാങ്ക് സ്വകാര്യ ബാങ്കാണ്. ആയതിനാല്‍ വ്യവസ്ഥ അനുസരിച്ച് നിയമിക്കാനാകില്ലെന്ന് ന്യൂനപക്ഷ വകുപ്പിലെ അഡീഷണല്‍ സെക്രട്ടറി 2018 സെപ്തംബര്‍ 28ന് കുറിപ്പെഴുതി ഫയല്‍ മടക്കി. പിന്നാലെ വീണ്ടും ജലീല്‍ താക്കീതുമായി രംഗത്തെത്തി. സംസ്ഥാന ധനകാര്യ വികസന കോര്‍പ്പറേഷന്‍ എംഡിയായി സഹകരണ ബാങ്കിലെ ഉദ്യോഗസ്ഥനെ മുമ്പ് നിയമിച്ചിട്ടുണ്ട്. അദീബിന്റെ മാതൃസ്ഥാപനമായ സൗത്ത് ഇന്ത്യന്‍ ബാങ്ക് അനുമതി നല്‍കിയതിനാല്‍ അദീബിനെ നിയമിച്ച് ഉത്തരവിറക്കാന്‍ അന്ന് തന്നെ ജലീല്‍ നിര്‍ദ്ദേശിച്ചു. ഇതോടെ അദീബിനെ നിയമിച്ച് ഉത്തരവിറക്കുകയായിരുന്നുവെന്ന് 75 പേജുള്ള ഫയല്‍ വ്യക്തമാക്കുന്നു. ഈ ഫയല്‍ പരിശോധിച്ചാണ് ലോകായുക്ത ജലീലിനെ മന്ത്രിസഭയില്‍ നിന്നു പുറത്താക്കാന്‍ നിര്‍ദ്ദേശിച്ചത്. ഫയല്‍ പുറത്തുവന്നതോടെ പ്രതിപക്ഷ ആരോപണം പോലെ ജലീല്‍-പിണറായി രഹസ്യ ഇടപാടുകള്‍ കൂടി മറനീക്കി പുറത്തു വരികയാണ്.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: