പത്തനംതിട്ട: ആറന്മുളയില്‍ സിപിഎമ്മിന്റെയും കോൺഗ്രസിന്റെയും പ്രവര്‍ത്തകര്‍ തമ്മില്‍ സംഘര്‍ഷമുണ്ടായി. ആറന്മുള ചുട്ടിപ്പാറയിലെ 233-ാം നമ്പര്‍ പോളിംഗ് ബൂത്തിലാണ് ഇരു വിഭാഗവും ഏറ്റുമുട്ടിയത്. പാര്‍ട്ടിക്കൊടിയുമായി ബൂത്തില്‍ വോട്ട് പിടിക്കാന്‍ ശ്രമിച്ചുവെന്നാണ് യുഡിഎഫ് സ്ഥാനാര്‍ഥി കെ ശിവദാസന്‍ നായര്‍ ഉള്‍പ്പെടെയുള്ളവര്‍ ആരോപിക്കുന്നത്. കൊടി ഉയര്‍ത്തി വോട്ട് പിടിക്കാന്‍ ശ്രമിച്ചത് യുഡിഎഫ് പ്രവര്‍ത്തകര്‍ തടയാന്‍ ശ്രമിച്ചപ്പോഴാണ് നേരിയ കയ്യാങ്കളിയുണ്ടായത്.
തുടര്‍ന്നാണ് യുഡിഎഫ് സ്ഥാനാര്‍ഥി ഉള്‍പ്പെടെയുള്ളവര്‍ സംഭവസ്ഥലത്തേക്ക് എത്തിയത്. ദീര്‍ഘനേരം കൊടി ഉയര്‍ത്തിപ്പിടിച്ച് വോട്ട് പിടിക്കാന്‍ ശ്രമം നടത്തിയെന്ന് ചൂണ്ടിക്കാട്ടി പൊലീസിനും കളക്ടര്‍ക്കും പരാതി നല്‍കിയിട്ടും നടപടിയെടുക്കാന്‍ തയ്യാറായില്ലെന്നും ആക്ഷേപമുണ്ട്. ശേഷമാണ് യുഡിഎഫ് പ്രവര്‍ത്തകര്‍ ഇടപെട്ടതെന്നാണ് കെ ശിവദാസന്‍ നായര്‍ ഉള്‍പ്പെടെയുള്ളവര്‍ പറയുന്നത്. പിന്നാലെ പൊലീസ് എത്തി കൊടി പിടിച്ചു നിന്നിരുന്ന പാര്‍ട്ടി പ്രവര്‍ത്തകനെ സ്ഥലത്തുനിന്നു നീക്കി.
പ്രതികരിക്കാൻ ഇവിടെ എഴുതുക: