പ്രവര്‍ത്തകരുടെ ആവേശം അലകടലായി; കഴക്കൂട്ടത്ത് താമരയുടെ ശക്തിതെളിയിച്ച് കെ. സുരേന്ദ്രന്റെയും ശോഭാ സുരേന്ദ്രന്റെയും റോഡ് ഷോ

തിരുവനന്തപുരം: കഴക്കൂട്ടം മണ്ഡലത്തെ കോരിത്തരിപ്പിച്ചും കയ്യിലെടുത്തും എൻഡിഎസ്ഥാനാർഥി ശോഭാസുരേന്ദ്രന്റെയും ബിജെപി സംസ്ഥാന അധ്യക്ഷൻ കെ.സുരേന്ദ്രന്റെയും റോഡ് ഷോ. ബിജെപിയ്‌ക്കെതിരെ നടത്തുന്ന വ്യാജപ്രചരണങ്ങൾക്ക് മറുപടി കൂടിയായി നാലാഞ്ചിറമുതൽ മണ്ണന്തലവരെയുള്ള റോഡ് ഷോ.

രാവിലെ 11 മണിയോടെ നാലാഞ്ചിറയിൽ ശോഭാ സുരേന്ദ്രന്റെ പര്യടന വാഹനം കടന്നു ചെല്ലുമ്പോൾ കെ.സുരേന്ദ്രനും പ്രവർത്തകരും കാത്ത് നിൽകുന്നുണ്ടായിരുന്നു. കെ.സുരേന്ദ്രൻ വാഹനത്തിൽ നിന്നും ഇറങ്ങിയതും പ്രവർത്തകരുടെ ആവേശത്തോടെയുള്ള ജയ് വിളികളുയർന്നു. പര്യടന വാഹനത്തിൽ നിന്നും ശോഭാസുരേന്ദ്രൻ കെ.സുരേന്ദ്രന് അഭിവാദ്യമർപ്പിച്ചു. പര്യടന വാഹനത്തിലേക്ക് എത്തിയ കെ.സുരേന്ദ്രനെ ശോഭ നിറഞ്ഞ പുഞ്ചിരിയോടെ ഷാൾ അണിയിച്ചു. തുടർന്ന് ഇരുവരും ചേർന്ന് കൈ ഉയർത്തിയും വിജയചിഹ്നം കാട്ടിയും പ്രവർത്തകരെ അഭിവാദ്യം ചെയ്തു. ഇതോടെ പ്രവർത്തകരുടെ ആവേശം അലകടലായി.

പര്യടന വാഹനത്തിന് മുന്നിലായി നൂറ് കണക്കിന് ഇരുചക്രവാഹനങ്ങളിൽ പ്രവർത്തകർ അണിനിരന്നു. കൊടിതോരണങ്ങളും  ആർപ്പുവിളികളുമായി പ്രവർത്തകർ അകമ്പടി സേവിച്ചു. റോഡിന് ഇരുവശവും ഇരുവരെയും കാണാനും സ്വീകരിക്കാനുംജനങ്ങളും അണിനിരന്നതോടെ ഉത്സവപ്രതീതി ഉണർത്തി. എംസി റോഡിലൂടെ പോകുന്ന വാഹനങ്ങളിലുള്ളവരെയും ഇരുവശവും നിന്നവരെയും നിറപുഞ്ചിരിയോടെയും കൂപ്പുകൈകളോടെയും അഭിവാദ്യം ചെയ്തു.

കഴക്കൂട്ടത്ത് വിജയം സുനിശ്ചിതമെന്ന് കെ.സുരേന്ദ്രൻ പറഞ്ഞു.നേതാക്കൾ ഒന്നും കഴക്കൂട്ടത്ത് എത്തുന്നില്ല എന്നത് വ്ര്യാജപ്രചരണമാണ്. ഇതൊക്കെ മാധ്യമങ്ങൾ പ്രചരിപ്പിക്കുകയാണ്. പ്രധാനമന്ത്രി ഏപ്രിൽ രണ്ടിനും ഉത്തർ പ്രദേശ് മുഖ്യമന്ത്രി യോഗി ആദിത്യനാഥ് ഏപ്രിൽ ഒന്നിനും കഴക്കൂട്ടത്ത് വരുന്നുണ്ട്. ഇത്രയധികം നേതാക്കൾ കേരളത്തിലേക്ക് വന്ന ഒരുതെരഞ്ഞെടുപ്പും ഇതുവരെ ഉണ്ടായിട്ടില്ല. ആവശ്യപ്പെട്ട ദേശീയ നേതാക്കളെ എല്ലാം ദേശീയ  നേതൃത്വം അനുവദിച്ചുതന്നു. കഴക്കൂട്ടം നേമം മാത്രമല്ല തിരുവന്തപുരത്തെ നിരവധി മണ്ഡലങ്ങൾ ജയിക്കുമെന്നും ബിജെപി നിർണായക ശക്തിയാകുമെന്നും  കെ.സുരേന്ദ്രൻ പറഞ്ഞു.